“Ular gapirayotganida maymun ko‘z oldimga keladi”. Bahora Arslonova labini kattalashtirayotgan aktrisalar haqida (video)

Aktrisa Bahora Arslonova “Daryo” internet-nashri uchun bergan intervyusida labi shishirilgan, kipriklari ulama va tobora bir-biriga o‘xshab ketayotgan ba’zi aktrisalarni keskin tanqid qildi.

Pardoz qilishni yoqtirmayman, baribir qozonda bori cho‘michga chiqadi. Ba’zi ayollar shunchalar ko‘p pardoz qilishadiki, chizilgan qoshlarni o‘chirib, ulama kipriklarni olib tashlasa, hamma undan qochib ketadi. Nazarimda, odamlar  tanasiga ozor bermasligi kerak. Tanamizdagi har bir a’zoni Parvardigor yaratgan, unga ozor emas, mehr berish kerak. Yaqinda eshitib, quloqlarimga ishonmadim. Labni katta qilishlari haqida eshitgandim. Endi sun’iy kulgich ham qo‘yib berishayotgan ekan. Ana shunday mutaxassislar sabab ko‘p qiz-ayollar bir-birlariga o‘xshab ketishyapti. Ilgari internetda Anjelina Joliga o‘xshagan qizlarning surati chiqqandi, endi esa ko‘cha-ko‘yda ham Anjelina Jolilar ko‘payib ketgan.

Ismini aytmayman-u, ammo yaqinda bir filmning syomkasida labi shishirilgan qiz bilan ishlashimga to‘g‘ri keldi. Partnyorim gapiryapti, lekin labi qimirlamayapti. Uni ko‘rib, o‘rdak bilan maymun ko‘z oldimga keldi. Xafa bo‘lishmasin-u, tashqaridan qaraganda shunday ko‘rinadi. Bizni suratga olayotgan operator ahvolimni ko‘rib, o‘zini kulgidan to‘xtatolmadi. Chunki men partnyor aktrisaning nima deyayotganini tushunmay, uning lablariga tikilib qolgandim.Keyin ba’zi aktrisalar uzun kipriklarni yopishtirib olishadi. Yig‘laydigan sahnalarda bu ulama kipriklar noqulaylik tug‘diradi. Xudoning o‘zi kechirsin-u, bunday ko‘rinish o‘zlariga yoqar, ammo tashqaridan qaraganda g‘alatiroq ko‘rinadi.Yaqinda turmush o‘rtog‘im bilan shu borada suhbatlashib qoldik. Unga ulama kiprik qo‘ygan, labini shishirgan va ingichka bel sohibasi bo‘lish uchun yettinchi qovurg‘asini oldirgan ayollar sizga yoqadimi, deb savol berdim. Er-xotin emas, shunchaki ayol sifatida erkak kishining fikrini bilmoqchi bo‘ldim. Turmush o‘rtog‘im kulib, bunday ayollar hech qaysi erkakka yoqmasligini aytdi. Odatda ba’zi qiz-ayollar erkaklarga yoqish uchun shunday sun’iylikdan foydalanishadi. Ammo erkaklarning ko‘pchiligi tabiiy ko‘rinishdagi qizlarni yoqtirishlarini aytishadi. Oldindan katta gapirmay, yonimda qizim, jiyanlarim bor. Ammo oilada aka-ukalar qizlarga sal qattiqqo‘llik qilishsa, yaxshi bo‘lardi.

Bahora Arslonova, aktrisa