Bokschi Muhammad Javod Vafoi 2019-yil noyabr oyida Eronda bo‘lib o‘tgan hukumatga qarshi namoyishlarda qatnashgani uchun o‘lim jazosiga hukm qilindi.

Foto: “Daily Star”

Sud qarori haqida jurnalist va aktivist Masi Alinajod o‘z Twitter sahifasida ma’lum qildi.

“2019-yil noyabr oyida Erondagi namoyishlarda qatnashgani uchun yana bir sportchi o‘limga hukm qilindi. Muhammad Javod, 26 yosh, boks bo‘yicha chempion.

Ular bokschini ‘yer yuzida korrupsiyani tarqatish’ aybi bilan o‘lim jazosiga hukm qildi. Biz eronlik jangchi Navid Afkarini qutqarib qololmadik. Bu safar butun dunyo sportchilari bizga yordam berishi mumkin”, — deb yozib qoldirdi Alinajod o‘z sahifasida.

Ekspertlarning qayd etishicha, “yer yuzida korrupsiyani tarqatish” aybi bilan o‘limga hukm qilish ko‘pincha muxoliflarga qarshi qo‘llaniladi.

2020-yilda 27 yoshli kurashchi Navid Afkari norozilik namoyishlarida qatnashgani uchun o‘lim jazosiga hukm etilgandi. Eron sudi Afkarini nafaqat hukumatga qarshi mitinglarda qatnashishda, balki 2018-yilda Shiraz shahrida qo‘riqchini o‘ldirishda ham aybdor deb topgan.