“Barselona” asosiy jamoada debyutini o‘tkazgan akademiya tarbiyalanuvchilarini tarixda qoldirishning antiqa usulini qo‘lladi.
Xavi “La Masiya” futbolchilariga ko‘proq imkoniyat bermoqda. Joriy mavsum Kataloniya jamoasi muxlislari Gavi va Niko Gonsales bilan tanishdi. Ansu Fati ancha oldin porlagandi (jarohatidan qutulib, “Real”ga qarshi o‘yinda gol ham urdi), himoyachilar Ronald Arauxo (Pikening almashtirib bo‘lmas sherigiga aylandi) va Erik Garsiya (hozircha jarohatdan tiklanmoqda) ham o‘zini ko‘rsatmoqda.
Tarkibda “La Masiya”dan ko‘p futbolchilar borligini hisobga olsa (tajribalilardan Pike, Buskets va Alba qoldi), “Barselona” asosiy tarkibda debyutini o‘tkazgan tarbiyalanuvchilarini qayd etishning o‘ziga xos usulini topdi. Har bir debyutantga tartib raqam bilan futbolkalar berib boriladi. 1979/80-yilgi mavsumdan buyon (o‘sha mavsumda “La Masiya” tashkil topgan) asosiy jamoada 192 nafar futbolchi maydonga tushgan.
Kataloniya Kubogidan tashqari istalgan o‘yinda maydonga tushish debyut hisoblangan (ushbu musobaqada “Barselona” doim ham ishtirok etmagan). Agar bir o‘yinda ikki futbolchi debyut o‘tkazsa, ularning maydonga tushgan vaqti inobatga olinadi. Agar bir vaqtda maydonga tushgan bo‘lsa, familiyalarining bosh harfiga qaralgan.
Ro‘yxatdagi birinchi futbolchi Xoan Xosep Estelasso (asosiy jamoada 100 ta o‘yin), Messi 93-o‘rinda
Ro‘yxat boshida Xoan Xosep Estelasso turibdi. Futbolchi 1979-yildan 1983-yilga qadar “Barselona” tarkibida 100 ta rasmiy o‘yinda ishtirok etgan. Jamoaning mashhur tarbiyalanuvchilari: Lionel Messi (93-o‘rin), Xavi (70), Andres Inyesta (85), Pep Gvardiola (44), Karles Puyol (75), Xerard Pike (119), Viktor Valdes (83), Serxio Buskets (120), Xordi Alba (143).
Oxirgi vaqtlarda ushbu ro‘yxatga Ansu Fati (178), Ronald Arauxo (179), Oskar Mingesa (181), Niko Gonsales (185) va Gavi (186) qo‘shildi. “Malyorka”ga qarshi o‘yinda debyutini nishonlagan Estanis Pedrola esa hozircha eng so‘nggi, 192-raqamli futbolkaga ega chiqdi.
Raqamlar orqali “Barselona” brend mashhurligini oshirmoqchi. Ammo bitta muammo bor: avvalgi tarbiyalanuvchilar haqida ma’lumot yetishmasligi
Keyingi debyutantlarni raqamlangan futbolkalarni topshirish marosimi kutib turibdi. Ro‘yxatda borlarga esa shartnomasi uzaytirilayotganda shunday futbolkalar taqdim etiladi. Shu tariqa “Barselona” Made in La Masia (“‘La Masiya’da ishlab chiqarilgan”) shiorini rivojlantirmoqda: klub bu bilan qiymat va brend mashhurligi oshishiga umid qilmoqda.“Barselona” ushbu ro‘yxatni yakuniy deb hisoblamaslikni, unda 1979/80-yilgi mavsumdan oldin o‘ynagan tarbiyalanuvchilar ismi yo‘qligini ta’kidlab o‘tdi: shunchaki kataloniyaliklarda XX asr o‘rtalarida asosiy jamoada o‘ynagan futbolchilar haqida ma’lumot ko‘p emas.
Lekin ilk tarbiyalanuvchi-debyutantni tanishtirib o‘tdi: u jamoada 100 yildan ham oldin o‘ynagan Paulino Alkantara. 1910-yildan 1970-yilga qadar asosiy jamoaga akademiyadan 70 nafar futbolchi jalb etilgan.
Izoh (0)