2022-yil 1-yanvardan 2023-yil 1-yanvarga qadar turizm faoliyati subyektlari va aviatashuvchilarning xorijiy mamlakatlardan O‘zbekistonga charter reyslarini tashkil qilish bo‘yicha turistik faoliyati subyektlari va aviatashuvchilarning xarajatlarini qoplash bo‘yicha davlat budjetidan ajratilgan kompensatsiya miqdori kamaytirildi. Bu haqda “Turizm, madaniyat, madaniy meros va sport sohalarini yanada rivojlantirish uchun qo‘shimcha sharoitlar yaratish to‘g‘risida”gi prezident farmonida so‘z boradi. Farmon matni O‘zAda e’lon qilingan.
Xususan, har bir xorijiy turist uchun, u respublika hududida kamida besh kecha tunab qolgan taqdirda, 10 AQSh dollari, qish mavsumida (20-noyabrdan 20-fevralgacha) esa 25 AQSh dollari miqdorida davlat budjeti mablag‘lari hisobidan qoplab beriladi.
2022-yil 1-maydan boshlab yoshlarning tadbirkorlik tashabbuslarini qo‘llab-quvvatlash maqsadida davlat budjetidan Turizm va sportni qo‘llab-quvvatlash jamg‘armasiga ajratiladigan mablag‘lar hisobidan har bir tashabbuskorga 50 million so‘m miqdorida, jami 10 milliard so‘mgacha grantlar ajratiladi. Bunda:
- grant mablag‘lari onlayn to‘lovlarni qabul qiluvchi zamonaviy veb-sayt yaratishga, xorijiy mamlakatlardagi turizm ko‘rgazma va yarmarkalarida ishtirok etishga yo‘naltiriladi;
- grant mablag‘lari belgilangan tartibda xorijiy mamlakatlardan O‘zbekistonga uch yil davomida kamida 200 nafar xorijiy turistlar uchun tur tashkil qilish sharti bilan ajratiladi.
Eslatib o‘tamiz, kompensatsiya 2020-yilning 1-yanvaridan joriy etilgandi. O‘shanda uning miqdori bir turist uchun 20 dollarni (qishki mavsumda — 50 dollarni) tashkil etgandi. Bu davlat budjeti va turizmni rivojlantirish Davlat qo‘mitasi huzuridagi Turizm sohasini qo‘llab-quvvatlash byudjetdan tashqari jamg‘armasi (endilikda Turizm va sport ishlari vazirligi huzuridagi Turizm va sportni qo‘llab-quvvatlash jamg‘armasi) hisobidan teng ulushlarda to‘lab kelingan.
Izoh (0)