Andijon viloyati perinatal markazi hovlisida o‘ndan ortiq daraxt viloyat hokimi buyrug‘i asosida kesib tashlangani to‘g‘risida xabar berilgandi. Davlat ekologiya qo‘mitasi holat bo‘yicha ishchi guruh tuzilganini ma’lum qildi.
Qayd etilishicha, Ekologiya va atrof-muhitni muhofaza qilish davlat qo‘mitasining ishchi guruhi 16-yanvar kuni voqea joyiga yetib borgan. 12 tup eldor qarag‘ayi daraxti amaldagi moratoriy muddatsiz davrga uzaytirilgan bir paytda noqonuniy ravishda kesilgani bo‘yicha hisob-kitob va o‘lchov ishlari amalga oshirilgan.
Holatga guvoh bo‘lgan shaxslar va bevosita huquqbuzarlikka aloqador mas’ul xodimlardan tushuntirish xatlari olingan. Qo‘shimcha ravishda mutaxassislar tomonidan shu atrofda o‘sib turgan 145 tup daraxt to‘liq xatlovdan o‘tkazilib, Davlat ekologiya qo‘mitasi tomonidan alohida muhofazaga olingan va har bir daraxtga yorliq biriktirilgan.
Perinatal markazi rahbariyatiga mazkur markaz egaligida bo‘lgan bino va inshootlarga tutash (chegaradosh) yer uchastkalarini obodonlashtirish, mavjud daraxtlar va butalarni parvarish qilish hamda sug‘orish ishlarini amalga oshirish bo‘yicha majburiy ko‘rsatma kiritilgan.
Sodir etilgan holat bo‘yicha ekologiya inspektorlari tomonidan to‘plangan barcha hujjatlar Andijon viloyati prokuraturasiga taqdim etilgan.
15-yanvar kuni Andijon Obodonlashtirish boshqarmasi viloyat perinatal markazi hududidagi 12 ta daraxtni kesib tashlagan. Xabarlarda daraxtlarni kesish viloyat hokimi buyrug‘i asosida amalga oshirilgani aytilgan. Viloyat hokimligi daraxtlar Andijon hokimi Shuhrat Abdurahmonovning buyrug‘i bilan kesilganini rad etgan. Yuqorida keltirilgan holat viloyat hokimligi tomonidan alohida nazoratga olindi. Hududda qonun buzilish holatlari aniqlangan taqdirda, aybdorlarga qonuniy jazo choralari ko‘rilishi va bu haqda batafsil axborot berilishini ma’lum qilamiz”, – deyiladi bayonotda.
O‘rganishlar davomida kesilgan daraxtlarning diametr o‘lchamlari 12 santimetrdan 40 santimetrgacha ekani, daraxtlarni qonunga xilof ravishda kesish natijasida o‘simlik dunyosiga ko‘p miqdorda zarar yetkazilgani qayd etilgan.
Mavzuga doir:
- Yunusobodda qurilish rejalashtirilgan hududdagi 4 ta qarag‘ay kesib tashlandi. Dekabrda bu yerdagi 10 ta qarag‘ay arralab ketilgandi
- O‘zbekistonda noqonuniy daraxt kesish holatlarini foto va videotasvirga olib jo‘natgan fuqarolarga pul to‘lanadi
- O‘zbekistonda 2021-yilning 10 oyi davomida daraxtlarning noqonuniy kesilishidan keltirilgan zarar 10 mlrd so‘mdan oshdi
Izoh (0)