Toshkentda taksiga o‘tirgan yo‘lovchining 800 dollarini olib qo‘ygan shaxslar ushlandi

Toshkent shahrida mashinaga o‘tirgan yo‘lovchiga kuch ishlatib, uning pullarini tortib olgan shaxslar ushlandi, deb xabar beradi Tergov departamenti.

Ma’lum qilinishicha, 8-yanvar kuni Andijon viloyati Asaka tumanida yashovchi 34 yoshli X.J. Yashnobod tuman IIO FMB boshlig‘i nomiga murojaat qilib, shu kuni soat 09:30 da talonchilik qurboni bo‘lganini bildirgan. U Toshkent xalqaro aeroporti yonida “vodiy pitak”ga borish uchun Lacetti rusumli avtomashinaga o‘tirgani, Yashnobod tumani THAY ko‘chasida joylashgan Andijon viloyatiga harakatlanadigan yo‘lovchi mashinalar turargohiga yetib kelganida haydovchi va yonida bo‘lgan yo‘lovchi uni mashinadan tushirib, unga kuch ishlatib, jami 800 dollar miqdoridagi pullarini ochiqdan ochiq talon-toroj qilgani va hodisa sodir bo‘lgan joydan yashiringanlarini ma’lum qilib, ularga nisbatan qonuniy chora ko‘rishni so‘ragan.

Olib borilgan tergov tezkor harakatlari natijasida ushbu jinoyatni Toshkent shahrida yashovchi 41 yoshli U.S. va Toshkent viloyatida yashovchi 36 yoshli Yu.A. sodir etgani aniqlangan.

Ushbu holat bo‘yicha Yashnobod tuman IIO FMB huzuridagi Tergov bo‘limi tomonidan U.S. va Yu.A.ga nisbatan Jinoyat kodeksining 166-moddasi 2-qismi “v” bandi (talonchilik) bilan jinoyat ishi qo‘zg‘atilgan. Hozirda gumonlanuvchilar protsessual tartibda ushlangan. Tergov harakatlari davom ettirilmoqda.

Bundan avval Andijonda ikki shaxsga zo‘rlik ishlatib, puli va telefonini olib qo‘ygan ayol ushlangani, Buxoroda o‘ziga notanish fuqaroga spirtli ichimlik ichishni taklif qilib, uni do‘pposlagan va tunagan shaxsga sud hukmi o‘qilgani hamda Farg‘onada mahalladagi tanishining oldiga kelgan yigitni qizlarning oldiga kelganlikda ayblab, urib, “yechintirib ketgan”lar qo‘lga olingani haqida xabar berilgandi.