Portugaliyaning ro‘yxatga olish va notarial instituti tekshiruv o‘tkazmoqda. Tekshiruv davomida “Chelsi” futbol klubi egasi, milliarder Roman Abramovichning fuqarolikka qabul qilinish jarayoni tekshiriladi. Bu haqda Renascensa xabar berdi.
Portugaliya Adliya vazirligining nashrga ma’lum qilishicha, bu ro‘yxatga olish xizmatining tartibida qandaydir qonunbuzarlik belgilari mavjud bo‘lganda amalga oshiriladigan odatiy protsedura.
Vazirlikning ta’kidlashicha, tergov ishtirokchilari Abramovich tomonidan fuqarolikni olish uchun taqdim etilgan hujjatlarni, jumladan, uning sefard yahudiylari jamoasiga mansubligini tasdiqlovchi materiallarni tekshiradi.
Roman Abramovich rekord darajada qisqa vaqt ichida Portugaliya fuqaroligini olgan, deb yozadi nashr. U zarur hujjatlarni 2020-yil oktabr oyida topshirgan va olti oy o‘tgach, 2021-yil aprel oyida Pireney yarim orolida yashovchi sefard yahudiylari jamoasining avlodi sifatida Portugaliya qonuniga binoan fuqarolikka qabul qilingan. Abramovich Portugaliya fuqarosiga aylangani haqida mahalliy OAV dekabr oyida xabar bergandi.
Roman Abramovich Rossiya, Portugaliya va Isroil fuqaroligiga ega. 2018-yilning may oyida Buyuk Britaniya uning investitsion viza olish uchun topshirgan hujjatlarini ko‘rib chiqish jarayonini kechiktirgach, Abramovich Isroil fuqaroligini olgan.
Izoh (0)