Xitoy AQSh tomonidan Eronga nisbatan bir tomonlama sanksiyalar qo‘llanishiga qarshi. Bu haqda mamlakat tashqi ishlar vaziri Van Iga tayanib, “Interfaks” xabar berdi.
“Van I Xitoy Eronga qarshi bir tomonlama noqonuniy sanksiyalarga, inson huquqlari kabi masalalarda siyosiy manipulyatsiyaga, Eron va mintaqadagi boshqa davlatlarning ichki ishlariga qo‘pol aralashishga qarshi keskin qarshi ekanini ma’lum qildi”, — deyiladi xabarda.
Xitoy tashqi ishlar vaziri eronlik hamkasbi bilan uchrashuvda Eron bilan hamkorlik qilishga, o‘zlarining asosiy manfaatlarini himoya qilishda bir-birlarini qo‘llab-quvvatlash, gegemonizm va kuch siyosatiga birgalikda qarshi turishga tayyorligini bildirgan.
Tomonlar Eron yadroviy dasturi atrofidagi vaziyat bo‘yicha fikr almashgan. Van I hozirgi vaziyat yuzaga kelishiga AQShning Keng qamrovli qo‘shma harakatlar rejasidan bir tomonlama chiqishi sabab yuzaga kelganini va “aynan ular asosiy mas’uliyatni zimmasiga olish hamda imkon qadar tezroq xatosini tuzatishi kerakligini” aytgan.
Avvalroq AQSh davlat kotibi Entoni Blinken NPR radiostansiyasi efirida Eron Keng qamrovli qo'shma harakatlar rejasini qayta tiklash bo‘yicha Venadagi muzokaralarda kelishuvga erishish uchun belgilangan muddat cheklanganini aytib o‘tgan.
Yadro bo‘yicha qo‘shma harakatlar rejasi deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashgan. 2018-yil may oyi boshida AQSh kelishuvdan bir tomonlama chiqishini e’lon qilgan va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etgandi.
Izoh (0)