Kaliforniya gubernatori Gevin Nyusom 1968-yilda AQSh senatori Robert Kennediga suiqasd uyushtirganlikda aybdor deb topilgan Serxan Serxanni muddatidan oldin ozod qilish haqidagi iltimosni rad etdi. Bu haqda Reuters xabar berdi.
Avvalroq Shartli ravishda muddatidan oldin ozodlikka chiqarish komissiyasi 77 yoshli Serxanning iltimosnomasini ko‘rib chiqib, uni ozod etish mumkin, degan xulosaga kelgandi. Kaliforniya gubernatori bu fikrga qo‘shilmadi. Los Angeles Times gazetasida Nyusom o‘z qarorini shunday izohlagan:
“Ishni, shu jumladan, Kaliforniya shtati arxividagi yozuvlarni sinchiklab ko‘rib chiqqanimdan so‘ng, men Serxan jamiyatga xavf tug‘dirmaslik uchun zarur bo‘lgan mas’uliyat va xabardorlik darajasiga yetmagan, degan xulosaga keldim”.
Serxanning himoyachisi gubernator qarori ustidan shikoyat qilmoqchi, dedi sudlanuvchining advokati Anjela Berri. Robert Kennedining bevasi va olti nafar farzandi ma’lum qilishicha, ular Serxanni shartli ravishda ozodlikka chiqarish rad etilganini “chuqur yengillik bilan” qabul qilgan.
Muddatidan oldin ozodlikka chiqish Serxan uchun o‘n oltinchi marotaba rad etildi.
Robert Kennedi 1963-yil 22-noyabrda Dallasda o‘ldirilgan AQSh prezidenti Jon Kennedining ukasi. Robert Kennedining o‘ldirilishi, xuddi akasi Jonning o‘limi kabi, ko‘plab fitna nazariyalarini keltirib chiqargan.
Falastinlik Serxan Serxan Robert Kennedini 1968-yilning iyunida Los-Anjelesdagi “Ambassador” mehmonxonasida otib ketgan. Qotillikka Kennedi Isroilni qo‘llab-quvvatlagani sabab bo‘lgan. Jinoyat sodir etgan vaqtda Serxan 24 yoshda bo‘lgan. Avvaliga Serxan o‘lim jazosiga hukm etilgan, ammo keyinroq jazo umrbod qamoq jazosi orqali yengillashtirilgan.
Izoh (0)