“Equinox haydaganimda do‘st bo‘lganlar Cobalt’ga o‘tganimda yo‘qolib qoldi”. Bahora Arslonova soxta do‘stlar haqida (video)

“Daryo” muxbiri Nargiza Murodova aktrisa Bahora Arslonova bilan intervyu tashkil qildi. Aktrisa suhbat davomida san’atdagi soxta dugonalari, Equinox mashinasi sabab ularni saralab olgani va “dedi-dedi” lardan charchagani haqida gapirdi.

San’atda birorta dugonam yo‘q. Opam Lola Eltoyeva va singlim Intizor Tojiboyevadan boshqa birorta yaqin insonim yo‘q. Balki sababini aytsam, kularsiz. Ammo hayotimda haqiqatan ham shunday bo‘ldi. Katta akam Equinox mashinasini olganda bir-ikki marta haydab yurdim. Ishonasizmi, shu darajada men bilan yaqin bo‘lishni istovchi insonlar ko‘payib ketdiki, ishim qolib, dugonalarim bilan vaqt o‘tkazadigan bo‘lib qoldim. Shundan keyin mashinani akamga topshirib, Cobalt oldim. Shundan keyin dugonalarim ancha saralanib qoldi. Oradan hech qancha vaqt o‘tmay, mashinani sotishimga to‘g‘ri keldi. Ishonasizmi, piyoda yurgan paytimda yonimda hech kim qolmadi. Bundan xafa emasman. Aksincha vaqtida ko‘zim ochilganidan quvondim. Bu dunyoda shunday insonlar bilan do‘st tutinish kerakki, sizga savobidan bera oladigan insonlar bo‘lishi kerak. Shu bois do‘st tanlashda ehtiyotkor bo‘lib qoldim. Sinab-sinab tanlangan do‘st haqiqiy bo‘ladi. Tabiatan ko‘nglim ochiq bo‘lgani uchun hammani o‘zimga yaqin deb bilardim. Hayotda o‘zimga yaqin olib, ichimdagi gaplarni aytgach, xuddi o‘sha aytilganlarni boshqa birovlardan eshitganman. “Dedi-dedi”lardan charchaganim uchun oxiri o‘sha insonlarga urishmoqchi bo‘lsang, gapingni yuzimga ayt, orqamdan gap tarqatib yurma, bo‘lmasa seni “yeb qo‘yaman” dedim. Chunki bunday gaplar asabimni yeb bitirgandi. Men Allohdan boshqa hech kimdan qo‘rqmayman. Shu bois haqiqatni yuziga aytaman. Otam rahmatli haq bo‘lsang, gapir, nohaq bo‘lsang, jimgina o‘tir deb o‘rgatgan.Men san’atda do‘stim yo‘qligidan afsuslanmayman. Qo‘g‘irchoq teatrida ishlovchi Sayyora ismli dugonam bor, undan boshqa hech kim bilan san’atda yaqin emasman.

Bahora Arslonova, aktrisa