“Bu yil barcha mahallalarda tub o‘zgarishlar yili bo‘lishi kerak” — Shavkat Mirziyoyev

Prezident Shavkat Mirziyoyev raisligida mahallabay ishlashning yangi tizimini yo‘lga qo‘yish va aholi bandligini ta’minlash bo‘yicha 2022-yildagi ustuvor vazifalarga bag‘ishlangan videoselektor yig‘ilishi bo‘lib o‘tmoqda. Bu haqda davlat rahbarining matbuot kotibi Sherzod Asadov ma’lum qildi.

Ma’lum qilinishicha, yig‘ilishda davlat rahbari faol islohotlar, tadbirkorlikni rivojlantirish va mahallabay ishlash boshlangani natijasida, 2021-yilda yalpi ichki mahsulot 7,4 foizga o‘sganini qayd etgan. Shuningdek, hududlarda 100 mingta yangi tadbirkor ish boshlagan, o‘zini o‘zi band qilganlar soni 700 mingga ko‘payib, 1,2 millionga yetgan.

Bundan tashqari, mahallabay ishlash tizimi orqali “temir daftar”dagi 583 ming ehtiyojmand oila doimiy daromad bilan ta’minlangan.

“2022-yilni ‘Inson qadrini ulug‘lash va faol mahalla yili’ deb e’lon qildik. Shu bois bu yil barcha mahallalarda tub o‘zgarishlar yili bo‘lishi kerak”, — deydi prezident.