Ukraina prezidenti Vladimir Zelenskiy Buyuk Britaniya bosh vaziri Boris Jonson bilan telefon orqali muloqot qildi. Ukraina rahbarining ta’kidlashicha, ular “keskinlikni pasaytirishga oid qadamlar haqida” fikr almashgan.
“Boris Jonson bilan samarali suhbat bo‘ldi. Biz Ukraina atrofidagi xavfsizlik bilan bog‘liq vaziyatni muhokama qildik”, — deb yozgan Zelenskiy Twitter’da.
Uning so‘zlariga ko‘ra, suhbat chog‘ida xususan, Ukrainada tinchlikka erishish yo‘llari muhokama qilingan. “Keskinlikni pasaytirish bo‘yicha ehtimoliy qadamlar haqida fikr almashdik. Tinchlikka erishish uchun umumiy sa’y-harakatlarni amalga oshiramiz”, — ta’kidlagan Zelenskiy.
Ukraina rahbari Britaniya bosh vaziriga Ukraina suvereniteti va hududiy yaxlitligini qo‘llab-quvvatlagani uchun yana bir bor minnatdorlik bildirgan.
Buyuk Britaniya Ukrainadagi eng yirik investorlardan biri hisoblanadi. 2020-yilda qirollik Ukraina iqtisodiyotiga to‘g‘ridan to‘g‘ri xorijiy investitsiyalar kiritish bo‘yicha Shveysariyadan keyin ikkinchi mamlakatga aylandi.
2020-yil oktabr oyida tomonlar 1,25 million funt sterling miqdorida harbiy va harbiy-texnikaviy sohalardagi hamkorlikni mustahkamlash bo‘yicha memorandumni imzolagan edi. 2021-yil iyun oyida ikki davlat dengiz sohasida hamkorlik qilish to‘g‘risida kelishib oldi. Oktabr oyida Ukraina Buyuk Britaniya ko‘magida ikkita yangi harbiy-dengiz bazasini qurishni boshlaganini ma’lum qildi.
Kiyev Londondan minalarga qarshi ikkita kema olishi kutilmoqda. 2021-yil noyabr oyida tomonlar Ukraina flotini qo‘llab-quvvatlash bo‘yicha 1,7 milliard funt sterling (taxminan 2,3 milliard dollar) miqdoridagi kredit shartnomasini imzolagan. Ukraina, xususan, 2024-yil oxirigacha Britaniya kompaniyalari bilan dengiz flotining harbiy salohiyatini mustahkamlash loyihasini amalga oshirish uchun zarur bo‘lgan shartnomalarning barchasini tuzishi kerak bo‘ladi. 2021-yil 8-dekabrda esa Buyuk Britaniya Ukrainani qo‘llab-quvvatlash uchun qo‘shimcha 1 milliard funt sterling ajratishi ma’lum bo‘ldi.
13-yanvar kuni “Interfaks” Pentagon rahbari Lloyd Ostin Ukraina mudofaa vaziri Aleksey Reznikov bilan muzokara o‘tkazgani haqida xabar berdi, ular Rossiya-Ukraina chegarasi yaqinida Rossiya qo‘shinlarining to‘planishi masalasini muhokama qilgan.
Mudofaa vaziri Lloyd Ostin ukrainalik hamkasbi bilan Rossiyaning Ukraina yaqinida harbiy jihatdan sababsiz va davomli kuchayishini muhokama qilgan. Ostin AQShning Ukraina suvereniteti va hududiy yaxlitligini, jumladan, mudofaa qobiliyatini mustahkamlashga qaratilgan sa’y-harakatlarini so‘zsiz qo‘llab-quvvatlashini yana bir bor tasdiqlagan.
Shuningdek, tomonlar keskinlikni yumshatish bo‘yicha diplomatik sa’y-harakatlarni qo‘llab-quvvatlashi va yaqindan hamkorlikni davom ettirishga intilishini bildirgan.
Mavzuga doir:
Izoh (0)