O‘zbekiston hududida terroristik jinoyatlarni sodir etgani uchun 23 yildan buyon qidiruvda bo‘lgan U.S. xorijda ushlanib, mamlakatga olib kelindi.
Ma’lum qilinishicha, U.S. (1967-yil Toshkent viloyatida tug‘ilgan) 1998-yilda Chechenistonda jangovar tayyorgarlikdan o‘tib, 1999-yilning 16-fevral kuni Toshkent shahrida amalga oshirilgan qo‘poruvchilik harakatlarida ishtirok etadi va o‘sha yilning mart oyida aylanma yo‘llar orqali xorijga chiqib ketgan.
Shuningdek, U.S. iordaniyalik Amir Xattob tomonidan Chechenistonda tashkil etilgan jangarilarni tayyorlash lagerlariga “Turkiston islom harakati” xalqaro terroristik tashkilotining O‘zbekistondan bo‘lgan a’zolarini jo‘natish bilan ham shug‘ullangan.
Ta’kidlanishicha, u 2001-yilning noyabr oyida boshqa shaxsning nomiga rasmiylashtirilgan soxta hujjatlar asosida MDHga a’zo davlatlardan birining fuqaroligini olib, o‘sha mamlakat hududida yashirinib yurgan.
O‘zbekiston Davlat xavfsizlik xizmatining chet el maxsus xizmatlari bilan hamkorlikda olib borgan tezkor-qidiruv tadbirlari natijasida U.S. hibsga olingan. Hozirda unga nisbatan qo‘zg‘atilgan jinoyat ishi doirasida tergov harakatlari olib borilmoqda.
Eslatib o‘tamiz, 2021-yilning sentabr oxirlarida DXX xodimlari tomonidan “Turkiston islom harakati” (“TIH”) xalqaro terroristik tashkiloti a’zosi, O‘zbekiston hududida o‘ta og‘ir jinoyatlar sodir etgani sababli 23 yildan buyon qidiruvda bo‘lgan Yu.J. xorijda ushlanib, mamlakatga olib kelingandi.
Avvalroq O‘zbekistonda qidiruvda bo‘lgan shaxs Rossiyada qo‘lga olingani, Rossiyada giyohvand moddalar savdosi bilan shug‘ullangan o‘zbekistonlik aka-uka 6 yilga qamalgani, O‘zbekistonda firibgarlik sodir etgani uchun xalqaro qidiruvda bo‘lgan ikki fuqaro Janubiy Koreyadan ekstraditsiya qilingani to‘g‘risida xabar berilgandi.
Izoh (0)