Amerikalik tadbirkor Ilon Maskning SpaceX kompaniyasi o‘zining tijoriy dasturi doirasida xususiy va davlat sun’iy yo‘ldoshlariga ega raketasini uchirdi, ular orasida Ukrainaning “Sich-2-30” apparati ham mavjud. Meduza’ning yozishicha, raketaning uchirilish translyatsiyasi kompaniya sayti orqali amalga oshirilgan.
Falcon 9 eltuvchi raketasi Floridadagi Kanaveral burnida joylashgan kosmodromdan Toshkent vaqti bilan soat 20:25 da uchirilgan. U dunyoning 20 mamlakatiga tegishli 105 ta sun’iy yo‘ldoshni orbitaga olib chiqqan bo‘lib, har bir apparatning og‘irligi 200 kilogrammdan oshmaydi.
“Sich-2-30”ni yaratish ustidagi ishlar bilan 2017-yildan buyon “Yujnoe” konstruktorlik byurosi shug‘ullanib kelayotgandi. Sun’iy yo‘ldosh Yer yuzasini tasvirga olish uchun mo‘ljallangan va uch yil davomida ishlay oladi. Apparatni uchirish Ukraina davlat kosmik agentligiga 1,99 million dollarga tushgan.
Ukraina oxirgi marta orbitaga o‘zining sun’iy yo‘ldoshini 2011-yilda uchirgan edi. O‘shanda “Sich-2” Orenburg viloyatidagi “Yasniy” kosmodromidan “Dnepr-1” eltuvchi raketasi yordamida uchirilgandi. Apparat bir yildan ortiq ishlab, quvvatlantirish elementidagi muammo sabab aloqaga chiqmay qo‘ygan. “Sich-2-30” — bu “Sich-2”ning modifikatsiya qilingan varianti.
Izoh (0)