Lionel Messi koronavirus sabab “PSJ”ning bitta, Argentina terma jamoasining esa ikkita o‘yinini o‘tkazib yuboradi

“PSJ” hujumchisi Lionel Messi koronavirus infeksiyasidan keyin tiklanishda davom etmoqda.

Mundo Deportivo nashrining xabar berishicha, argentinalik futbolchi jamoadan alohida mashg‘ulotlarni davom ettirmoqda va Liga 1 ning 21-turi doirasida 15-yanvar kuni bo‘lib o‘tadigan “Brest”ga qarshi o‘yinda ishtirok etmaydi.

Shuningdek, 34 yoshli Messi Argentina terma jamoasining JCh—2022 saralashidagi Chili (28-yanvar) va Kolumbiyaga (1-fevral) qarshi o‘yinlarini ham o‘tkazib yuborishi qo‘shimcha qilingan.

Eslatib o‘tamiz, 2-yanvar sanasida Messining koronavirusga chalingani xabar qilingandi. Hujumchi oxirgi marta 2021-yilning 22-dekabr kuni “PSJ”ning “Loryen”ga qarshi o‘yinida (1:1) maydonga tushgan.

Messi 2021/22-yilgi mavsumda barcha musobaqalar doirasida 16 o‘yinda maydonga tushib, 6 ta gol va 5 ta golli uzatmaga mualliflik qildi.