HBO Max va CNN Aleksey Navalniy haqida hujjatli film tasvirga oldi

HBO Max va CNN Films kompaniyalari rossiyalik siyosatchi Aleksey Navalniy haqida “Navalniy” nomli hujjatli filmni suratga oldi, deb xabar beradi Deadline.

Filmda siyosatchining zaharlanishi, davolanishi va Rossiyaga qaytishi haqida hikoya qilinadi. Kartinaga hujjatli filmlar bo‘yicha mutaxassis kanadalik Deniel Roer rejissorlik qilgan. U o‘z ishini “bir inson taqdiri va uning avtoritar rejimga qarshi kurashi” deya ta’riflagan.

Film qachondan boshlab namoyish etilishi hozircha noma’lum. Aleksey Navalniyning Instagram’dagi sahifasida aytilishicha, kartinaning jahon premyerasi “tez orada bo‘lib o‘tadi”.

Film HBO Max striming servisi orqali namoyish etiladi. Rossiyada undan foydalanishning imkoni yo‘q; ushbu servisning asosiy kontentini “Amediateka” ko‘rsatadi.

Ma’lumot uchun, muxolifatchi Aleksey Navalniy 2021-yilning 17-yanvar kuni Rossiyaga Germaniyadan qaytib keldi, u yerda qariyb besh oy davomida bo‘lib, “Novichok” bilan zaharlanganidan keyin davolandi. Tarafdorlari uni kutib olish uchun Vnukovo aeroportiga keldi. U yerda ommaviy hibsga olishlar bo‘lib o‘tdi, Navalniy o‘tirgan samolyot esa Sheremetevoga qayta yo‘naltirildi. Qo‘nganidan keyin siyosatchi qo‘lga olindi — “Iv Roshe” ishi bo‘yicha shartli mahkum majburiyatlarini buzganligi uchun.

18-yanvar kuni Navalniy qamab qo‘yildi, sud esa to‘g‘ridan to‘g‘ri politsiya bo‘limida o‘tkazildi. 19-yanvar kuni Navalniy tomonidan tashkil qilingan Korrupsiyaga qarshi kurash fondi (KKF) “Putinning qasri” haqidagi filmni e’lon qildi. U 100 million martadan ortiq tomosha qilindi, ijtimoiy tarmoqlar esa shu mavzudagi memlarga to‘lib ketdi. Hukumat uning qasr emas, apart-mehmonxona ekanligini va unga Putin emas, balki uning do‘sti Arkadiy Rotenberg egalik qilishini ma’lum qildi.

Navalniyning tarafdorlari butun Rossiya bo‘ylab ommaviy norozilik aksiyalarini uyushtirdi. 23-yanvar kuni to‘rt mingdan ortiq, 31-yanvar kuni besh mingdan ortiq odam hibsga olindi. Ko‘p yillardan buyon bunaqasi bo‘lmagandi. Federal telekanallar “xushmuomala politsiyachilar” haqida hikoya qildi, aslida esa ular namoyishchilarga qarshi dubinka, elektroshoker va ko‘zni yoshlantiruvchi gaz qo‘llagan edi (Kreml buni provokatsiyaga javob deb atadi).

Aksiyalardan keyin kamida 40 ta jinoyat ishi qo‘zg‘atildi. Navalniyning safdoshlari Lyubov Sobol va Kira Yarmish, shuningdek, siyosatchining ukasi Oleg mitingda koronavirusga qarshi choralarni buzganlik uchun uy qamog‘iga hukm qilindi. Navalniyning yana bir safdoshi Leonid Volkov o‘smirlarni ko‘cha aksiyalariga jalb qilganlik uchun qidiruvga berildi.

Moskvaning Simonov tumanlararo sudi 2-fevralda Navalniyni “Iv Roshe” ishi bo‘yicha aybdor deb topib, uning jazoni koloniyada o‘tashi haqida qaror chiqargandi. Moskva shahar sudi 20-fevralda qarorni qonuniy deb topdi va sud hukmi kuchga kirdi.

Navalniy koloniyada 2,5 yil davomida sud belgilagan jazoni o‘taydi.

Avvalroq Navalniyning zaharlanishi yuzasidan bir qancha ommaviy axborot vositalari jurnalistlarining birgalikda olib borgan surishtiruvi “Yangiliklar dasturidagi surishtiruv-reportaj” nominatsiyasi bo‘yicha Amerika televideniyesining “Emmi” mukofotiga sazovor bo‘lgandi.