“Harbiy kiyimdagi hokim, hilpiragan bayroq ostida qo‘shiq kuylagan Ravshan Sobirov” — Qashqadaryoda bo‘lib o‘tgan Vatan himoyachilari kunidan fotoreportaj

Qashqadaryo viloyatida 14-yanvar — Vatan himoyachilari kuni keng nishonlandi. Viloyatning G‘uzor tumanida bo‘lib o‘tgan bayram tadbirida qatnashgan “Daryo” muxbiri tadbirning e’tiborga molik jihatlarini suratga oldi.

Qayd etilishicha, tumanda bo‘lib o‘tgan Vatan himoyachilari kunida estrada xonandasi Ravshan Sobirov ham qatnashib, Vatan himoyasiga chorlovchi “Askar” qo‘shig‘ini kuylagan.

Tadbirda 2018-yilning avgust oyidan 2020-yilning aprel oyiga qadar G‘uzor tumani prokurori, 2020-yildan ayni kunga qadar tuman hokimi sifatida ishlab kelayotgan Bekzod Suyunov harbiy kiyimda ko‘rinish bergan.

“Vatan haqidagi, yigitlarni askarlikka chorlovchi taronalar har bir yurtdoshimiz qalbiga o‘zgacha ta’sir qiladi. Bugun o‘zimda shuni his qildim. Vatan haqidagi, vatanparvarlik haqidagi qo‘shiqlarni tinglab, O‘zbekistondek yurtda yashayotganimdan faxrlanib ketdim. Tadbirda chiqish qilgan harbiylarning epchillik bilan harakatlanishi Vatanimiz himoyasi mard, jasur o‘g‘lonlar qo‘lida ekaniga yana bir marta ishonch uyg‘otdi”, — deydi tadbirda qatnashgan bloger Umid Karimov.