O‘zbekistonlik qancha talaba 2022-yilda budjet hisobidan xorijda o‘qishi ma’lum qilindi

“El-yurt umidi” jamg‘armasining 2022-yil uchun kvotalari 420 ta etib belgilandi. Bu haqda 12-yanvar kuni AOKAda bo‘lib o‘tgan matbuot anjumanida jamg‘armasi ijrochi direktori o‘rinbosari Javohir Ahmedov ma’lum qildi.

Qayd etilishicha, ta’lim dasturlari kesimida jami 2068 o‘ringa, jumladan, bakalavriatga 253 o‘rin, magistraturaga 1259 o‘rin va doktoranturaga 556 o‘ringa ehtiyoj mavjudligi qayd etilgan. Ehtiyojlardan kelib chiqib, kvotalar 420 ta etib tasdiqlangan.

Kvotalar jamg‘arma dasturlari kesimida quyidagi ko‘rinishda e’lon qilinmoqda:

• bakalavriatga 120 o‘rin;
• magistraturaga 180 o‘rin;
• doktoranturaga 120 o‘rin.

Jamg‘arma tomonidan 2021-yilda o‘tkazilgan tanlovlar natijalariga ko‘ra jami 371 nafar nomzod “Jamg‘arma stipendiati” deb e’tirof etilgan. Bugungi kun holatiga ularning 303 nafari Buyuk Britaniya, Germaniya, Fransiya, Italiya, Ispaniya, Belgiya, Latviya, AQSH, Kanada, Yaponiya, Janubiy Koreya, Xitoy, Malayziya, Rossiya, Belorussiya kabi davlatlarning universitetlariga ta’lim olish uchun yuborilgan.

Bakalavriat dasturi bo‘yicha xorijiy oliy ta’lim tashkilotlaridan stipendiatlar va jamg‘arma tomonidan jami 560 ming 700 dollar, magistratura dasturi bo‘yicha 195 ming 600 dollar, doktorantura ta’lim dasturlari bo‘yicha 60 ming dollar miqdorida chegirmalar olingan.

Shuningdek, magistratura va doktorantura ta’lim dasturlari bo‘yicha 16 nafar Jamg‘arma stipendiatini o‘qishi to‘liq grant asosida bo‘lib, o‘rta hisobda har bir stipendiatdan 25 ming dollardan jami 400 ming dollar miqdorida davlat budjetdan ajratilishi rejalashtirilgan mablag‘ iqtisod qilinmoqda.

2022—2026-yillar davomida Jamg‘arma ta’lim dasturlari bo‘yicha xorijga ta’lim olish uchun yuboriladigan yoshlar va mutaxassislar soni yildan yilga oshirilib, 2021-yildagi 350 nafar o‘rindan 2026-yilga kelib 700 nafarga yetkazish belgilangan.