Toni Kroos faoliyatini qaysi klubda yakunlamoqchi ekanligini aytdi

“Real” futbolchisi Toni Kroos kelajagi bilan bog‘liq savollarga javob berdi.

Germaniyalik futbolchi AS’ga bergan intervyusida faoliyatini “qaymoqranglilar” safida yakunlashni maqsad qilganini aytib o‘tdi.

“Real” bilan shartnomani uzaytirish haqida

Klub men uchun va men klub uchun qanday ahamiyatga ega ekanligimizni yaxshi bilamiz. Qaysidir pallalarda biz bunga birgalikda yondashamiz. Ishonch — eng muhimi. Men hamon o‘zimni yaxshi his qilmoqdaman, lekin ba’zi narsalar bo‘lishi kutilmoqda. Avvalo, jamoa va mening darajam bir-biriga mos kelishi kerak. Ikkinchidan, jismoniy holatim normal bo‘lishi lozim. Uchinchidan, mening ham xohishim bo‘lishi kerak. Barchasi mos kelganidan so‘ng, biz gaplashishimiz mumkin. Amaldagi shartnomam 2023-yilda o‘z yakuniga yetadi. Faoliyatimni “Madrid”da tugatmoqchiman va shunday bo‘ladi ham. Butun diqqatimni ushbu jamoaga qaratganman. Madridda sakkizinchi mavsumimni o‘tkazyapman va bu qoyilmaqom munosabat.

Kilian Mbappe va Erling Holandning “Real”ga o‘tish ehtimoli haqida

Jamoa ichida hech qanday muammo yo‘q. Sakkiz yildan buyon shu yerda bo‘lsam, jamoaga kelmagan qancha futbolchilar haqida mish-mishlar eshitdim. Ikkala futbolchi haqida gapirayotganda ularning shartnomalari, sifatlari va jamoalardagi vaziyati haqida ham eslab o‘tish lozim. Ikkalasi ham kelayotgan yozda transferlar bozorida eng xaridorgir bo‘lishi kutilayotgan futbolchilar. “Real” doim eng yaxshilarini izlaydi, Mbappe va Holand bunga mos keladi. Ular keladimi-yo‘qmi aniq ayta olmayman, chunki men prezident emasman.

Chempionlar Ligasi doirasida “PSJ”ga qarshi bahs haqida

Biz buni odatdagidek qabul qilamiz. Albatta, bunday uchrashuvlar yarim final yoki finalda bo‘lib o‘tishi kerak edi. Bunday raqib bilan balki pley-offda erta duch kelayotgandirmiz, lekin yaxshi formada va jarohatlarsiz yetib olamiz deb umid qilaman. Agar shunday bo‘lsa, biz “PSJ”ga qarshi o‘yinga tayyormiz.

Germaniya terma jamoasidagi faoliyatini yakunlash va Jahon Chempionatini o‘tkazib yuborishi haqida

Xayolimga birinchi kelgan o‘y — Jahon Chempionati vaqtida nima qilish haqida bo‘ldi. Men uzoq muddatli qishki ta’tilga (2022-yilgi mundial qishda bo‘lib o‘tadi — “Daryo”) o‘rganmaganman va terma jamoa bilan birga bo‘lmayman. Ammo dam olish uchun yaxshi joy topa olaman. Terma jamoani sog‘inishim mumkin, lekin u yerga qaytish uchun hech qanday sabab yo‘q.

Katta musobaqalarda barchasi mujassam bo‘ladi: butun jamoaning bir maqsad yo‘lida kurashishi, Germaniyaning sening ortingda turishi va sen ajoyib hislarni tuyasan. Ushbu hissiyotlarni musobaqa vaqtida muxlislar bilan bo‘lishishing. Bu har doim o‘ziga xos bir narsa edi. Balki, Jahon Chempionati vaqtida ushbu hislarni qayta tuyish uchun qaysidir o‘yinga borarman.

Toni Kroos, “Real Madrid” futbolchisi