Rossiyada artist Leonid Kuravlyovning koronavirusga chalingani gumon qilinib, u shifoxonaga yotqizildi. Bu haqda “Starhit.ru” xabar bergan.
Xabarga ko‘ra 85 yoshli aktyorning ikkala o‘pkasi yallig‘langan va u jonlantirish bo‘limida shifokorlarning doimiy nazoratiga olingan. Qon saturatsiyasi muolajalardan keyin me’yoriy holatga qaytmoqda, biroq qon bosimi hamda tana harorati pasayib ketgan.
Koronavirusga chalinguniga qadar Kuravlyov nafas olishga qiynalar, so‘nggi vaqtlarda yurak qon-tomir kasalligi asoratlari bilan kurashib kelar, shuningdek, aktyor arterial qon bosimining yuqoriligi tufayli tez-tez boshi aylanayotganidan shikoyat qilgan.
Kuravlyov MDH davlatlaridagi teletomashabinlarga “Ivan Vasilyevich o‘z kasbini o‘zgartiradi”, “Afonya”, “Hayot uchun xavfli”, “To‘g‘ri so‘zning to‘qmog‘i” va boshqa filmlar, seriallardagi rollari bilan tanilgan. Faoliyati davomida 200 dan ortiq filmlarda suratga tushgan.
2021-yil fevralida “Ivan Vasilyevich kasbini o‘zgartiradi” filmi yulduzi Leonid Kuravlyovning OAV va jamoatchilikdan uzoqlashgani haqida xabar berilgandi.
Izoh (0)