Oliy Majlisning Inson huquqlari bo‘yicha vakili (ombudsman) tomonidan 38 nafar fuqaroning “Usmon Yusupov Agroservis mashina traktor parki” mas’uliyati cheklangan jamiyati tomonidan ish haqi pullarini o‘z vaqtida to‘lanmayotgani masalasida yozgan murojaati o‘rganib chiqildi.
O‘rganish jarayonida aniqlanishicha, “Usmon Yusupov Agroservis mashina traktor parki” MChJ 2020-yil 1-avgustdan to 2021-yil 1-oktabrgacha ishlangan davr uchun xodimlariga 335 610 914 so‘mga yaqin ish haqlarini to‘lamagan.
Vaholanki, “Uzagroservis” AJ tomonidan Qoraqalpog‘iston va viloyat “Agroservis MTP” MChJ rahbarlariga 2021-yil 16-sentabr kuni yo‘llagan xatda, ishchi xodimlarning huquq va qonuniy manfaatlari himoyasini so‘zsiz ta’minlash maqsadida rahbarlik qilinayotgan jamiyat va quyi korxonalarni ish haqi va budjet to‘lovlaridan mavjud qarzdorliklarini amalda ajratilayotgan g‘alla 2022-yil hosili uchun imtiyozli kredit mablag‘lari hamda boshqa manbalar hisobidan undirish choralarini ko‘rilishini talab qilingan.
“Oliy Majlisning Inson huquqlari bo‘yicha vakili (ombudsman) to‘g‘risida”gi qonunining 14-moddasiga binoan Ombudsman tomonidan Fuqarolik ishlari bo‘yicha Kasbi tumanlararo sudiga murojaatchilarning manfaatlarida da’vo ariza kiritildi. Da’vo arizasi o‘rganib chiqilib, sud buyruqlari bilan umumiy hisobda 335 610 914 so‘m miqdorida ish haqi undirilishi va darhol ijroga qaratilishi belgilandi.
Izoh (0)