Misrning Sinay yarim oroli janubida avtobus va mikroavtobus ishtirokidagi keng ko‘lamli yo‘l-transport hodisasi yuz berdi. Oqibatda kamida 16 kishi halok bo‘ldi, deb yozmoqda Reuters.
Bundan tashqari avariyada 18 kishi jarohatlangan.
Hodisa joyiga 13 ta tez yordam mashinasi yetib kelgan. Yaradorlar Tor Sinay va Sharm ash-Shayx shifoxonalariga yetkazildi.
“Jarohatlar har xil ko‘rinishda: sinish, terining kesilishi va shilinishi, miya chayqalishi kabilar bilan barcha yaradorlarga zarur tibbiy yordam ko‘rsatildi”, — deyiladi xabarda.
Hodisaning boshqa tafsilotlari hozircha berilmagan. Hudud gubernatori Xolid Fuda mahalliy politsiyaga voqeani har tomonlama tekshirishni buyurdi.
Avvalroq Ekvadorda yo‘lovchilarni olib ketayotgan avtobusning ag‘darilib ketishi oqibatda 18 kishi halok bo‘lgan, yana 25 kishi yaralangandi. Noyabr oxirida Bolgariyada sayyohlik avtobusi YTHga uchrab, yonib ketgan edi. Oqibatda 46 kishi halok bo‘lgan.
Dekabrda Gaitining Kap Aitiyen shahrida yonilg‘i tashuvchi avtosisterna yo‘l-transport hodisasiga uchragan. So‘ng yuk mashinasida kuchli portlash yuz bergan, oqibatda 40 dan ortiq odam halok bo‘lgan.
Izoh (0)