Buxoro viloyati Vobkent tuman tibbiyot birlashmasida ilk bor tug‘ma taloq kistasini loproskopik kistoektomiyasiga oid murakkab jarrohlik amaliyoti o‘tkazilib, shu tashxis bilan og‘rigan 17 yoshli o‘smir hayoti saqlab qolindi. Bu haqda “Daryo”ga tuman tibbiyot birlashmasi boshlig‘i o‘rinbosari Anvar Rasulov xabar berdi.
Ta’kidlanishicha, tumandagi “Xalach” mahallasi Yalangichoyxona qishlog‘ida yashovchi Mirshodbek Shomurodov (2005-yilda tug‘ilgan) taloq yiringlashi kistasi xastaligi bilan og‘rigan. U qorin sohasida kuchli og‘riq va tana harorati keskin ko‘tarilgan ko‘yi og‘ir ahvolda shifoxonaga keltirilgan. O‘smirda murakkab laproskopik kistoektomiya jarrohlik amaliyoti qo‘llanilgan.
“Bunday bemorlarga tezkor chora ko‘rilmasa, og‘ir asoratlarga olib kelishi mumkin. Aniqrog‘i, kista yorilishi va undan qon ketishi hayot uchun juda xavfli. Odatda bunday kasalliklar jarrohligini, ya’ni tanaga yuqori aniqlikda ishlovi tibbiy uskunadan uchta naycha kiritish va qorin bo‘shlig‘ini naychalash yo‘li bilan operatsiya o‘tkazish uchun respublika shifoxonalariga yo‘llanma berilgan. Vaziyatni inobatga olgan holda, tuman tibbiyot birlashmasida ushbu jarrohlikni ilk marotaba o‘tkazishga to‘g‘ri keldi. Operatsiya ikki soat davom etdi va muvaffaqiyatli o‘tdi. O‘smirning umumiy ahvoli qoniqarli. Hozirda Mirshodbek Shomurodov uyiga ruxsat berilgan va ambulator nazoratiga olingan”, — deydi Anvar Rasulov.
Murakkab jarrohlik amaliyotiga viloyat ko‘p tarmoqli bolalar kasalxonasidan ham jarrohlar jalb etilgan.
Mavzuga doir:
- Senat inson a’zolari va to‘qimalarining transplantatsiyasi to‘g‘risidagi qonunni ma’qulladi
- O‘zbekistonning barcha hududlarida 2022-yil oxirigacha buyrak transplantatsiyasi amaliyoti yo‘lga qo‘yiladi
- Andijonda murakkab operatsiyalarga muhtoj, ehtiyojmand aholiga yordam berish bo‘yicha maxsus jamg‘arma tashkil etiladi
Izoh (0)