O‘zbekistonda talabalar uchun mahalliy aviaqatnovlarga berilgan chegirmaning amal qilish muddati 24-yanvarga qadar uzaytirildi. Bu haqda Uzbekistan Airways xabar qildi.
Qayd etilishicha, oliy va professional ta’lim muassasalari, akademik litsey talaba-o‘quvchilari uchun qishki ta’til muddati 2022-yil 24-yanvarga qadar uzaytirilgani bois Uzbekistan Airways AJ 23-yanvarga qadar talabalar uchun respublika bo‘ylab amalga oshiriladigan ichki reyslarga 50 foizlik chegirma muddatini uzaytirgan. 10-yanvarga qadar xarid qilingan aviachiptalar 23-yanvargacha rejalashtirilgan reyslarga bepul qayta bron qilinadi.
Shuningdek, aviakompaniya 20—23-yanvar kunlari qo‘shimcha reyslarni amalga oshiradi.
Eslatib o‘tamiz, O‘zbekistonda talaba va o‘quvchilar uchun qishki ta’til 25-dekabrdan boshlangan edi. Ta’til 2022-yilning 10-yanvarigacha davom etishi va dars jarayonlari 11-yanvardan boshlanishi belgilangandi. Keyinroq oliy ta’lim muassasalarining talabalari, akademik litsey va hunar maktablari o‘quvchilari uchun qishki ta’til muddati 24-yanvargacha uzaytirildi. Bunga sabab qilib rektorlar, prorektorlar, dekanlar va moliya masalalariga mas’ullar uchun o‘z kasbiy mahoratini oshirish, yangicha tartibda ishlashni boshlash maqsadida 2022-yil 10—24-yanvar kunlari amaliy seminar-treninglar tashkil etilishi ko‘rsatilgan.
Qishki ta’til munosabati bilan Uzbekistan Airways va “O‘zbekiston temir yo‘llari” Yangi yil munosabati bilan maxsus chegirmalar e’lon qilgan. Keyinchalik talabalarga avia va temiryo‘l chiptalarni 24-yanvargacha bepul almashtirish imkoni berildi.
Izoh (0)