“Chilonzor” metro bekatida tajriba tariqasida hojatxona qurish ishlari olib borilmoqda — Toshkent metropoliteni

Toshkent metropoliteni 28-dekabr kuni “Daryo” nashrida “Kassalarda navbat, tibbiy yordam ololmaysan, bekatlarni nomi emas, o‘rindiqlariga qarab ajratasan. Toshkent metrosiga nimalar yetishmayapti?” sarlavhasi ostida e’lon qilingan maqolaga munosabat bildirdi.

Maqolada Toshkent metropolitenida sodir bo‘layotgan nosozliklar, ko‘rsatilayotgan xizmatlar sifati, qulaylik va kamchiliklar to‘g‘risida ma’lumot berilgandi.

Toshkent metropolitetining ma’lum qilishicha, biror yo‘nalishda tarmoqlar kengaygani sari unga bo‘lgan talab ham oshib boraveradi. “Bunga birgina misol, Toshkent metropoliteniga yangi yo‘nalish qo‘shilgani va yangi bekatlar bino qilingani orqali yo‘lovchilar oqimining tobora oshib borayotganidir. Bu borada raqamlarga murojaat etadigan bo‘lsak metropolitendan 2019-yil bir kunda o‘rtacha 200—220 ming yo‘lovchi foydalangan bo‘lsa, bugungi kunda ularning soni 380—420 mingni tashkil etmoqda. Yo‘lovchilar oqimi ko‘p bo‘lgani sabab 2022-yilda yana 14 ta harakat tarkibi xarid qilinishi nazarda tutilgan”, — deyiladi munosabatda.

Shuningdek, metroda yo‘lovchilar xavfsizligini ta’minlash va ularga qulayliklar yaratish borasidagi takomillashtirilayotgan ishlar to‘g‘risida ma’lumot berilgan:

• O‘zbekiston prezidentining “Toshkent metropoliteni faoliyatining samaradorligini oshirish chora-tadbirlari to‘g‘risida”gi qaroriga asosan metropoliten infratuzilmasini modernizatsiya qilish hamda harakat tarkiblarini bosqichma-bosqich yangilash, eskirgan harakat tarkiblarini kapital ta’mirlash borasida aniq rejalar belgilangan. Hozirda metro vagonlaridagi texnik nosozliklar borasida chora-tadbirlar ishlab chiqilib, kamchiliklari o‘z vaqtida bartaraf etilmoqda. Metropolitenda harakat xavfsizlik tizimini takomillashtirish orqali yo‘lovchilar va harakat xavfsizligi darajasini oshirishda zamonaviy bilimga ega kadrlar tayyorlash tizimini joriy etish orqali sohani malakali kadrlar bilan ta’minlashda Oliy ta’lim muassasalarida metropoliten ishchi xodimlarini malakasini oshirish ishlari tashkil etilgan;
• Toshkent metropolitenida yo‘lovchilarga sifatli va xavfsiz xizmat ko‘rsatishni tashkil qilish maqsadida metro bekatlarida yo‘l ko‘rsatkichini zamonaviy dizayn asosida bosqichma bosqich almashtirish ishlari belgilangan. Ayni kunlarda yo‘l ko‘rsatkichlari me’yoriy loyiha hujjatlari asosida o‘rnatilgan.

Ta’kidlanishicha, yerosti bekatlarida kishi sog‘lig‘iga ta’sir ko‘rsatuvchi bosim borligini inobatga olgan holda barcha bekat navbatchilari birinchi yordam ko‘rsatish ma’lumotiga ega va barcha bekatlarda birinchi yordam ko‘rsatish uchun dori vositalari bilan ta’minlangan. Bundan tashqari, zarur vaqtlarda tez yordam ishchi xodimlari chaqirtiriladi, metropolitenning “Paxtakor” va “Ming o‘rik” bekatlarida tibbiy punktlar mavjud.

Shu bilan birga, Toshkent metropolitenida nima sababdan hojatxonalar yo‘qligiga ham to‘xtalib o‘tilgan.

Yerusti metro bekatlarida imkoniyati cheklangan yo‘lovchilar foydalanishi mumkin bo‘lgan liftlar o‘rnatilgani ko‘pchilikka ma’lum. Liftlardan asosan keksalar, homilador ayollar, yosh bolali va nogironligi bo‘lgan shaxslar foydalanishi belgilangan. Bekatlardagi mavjud liftlar va eskalatorlarni bir maromda ishlashini tashkil qilish va nazorat o‘rnatish borasida metropoliten xodimlari orasida doimiy navbatchilik yo‘lga qo‘yilgan. Hozirgi kunda barcha yerusti metro bekatlarida mavjud liftlar soz holda ishlab, yuqorida ko‘rsatilgan toifadagi yo‘lovchilarga hech qanday cheklovlarsiz xizmat ko‘rsatmoqda;

Ma’lum qilinishicha, hozirgi kunda barcha yer usti metro bekatlarida mavjud liftlar soz holda ishlab, keksalar, homilador ayollar, yosh bolali va nogironligi bo‘lgan shaxslar hech qanday cheklovlarsiz xizmat ko‘rsatmoqda.

“Qayd etish lozimki, 2020-yildan Toshkent metropolitenida Avtomatlashtirilgan to‘lov tizimi joriy etilib, yo‘lovchilarga qulayliklar yaratish maqsadida, transport va imtiyozli kartalar amalda tatbiq etildi. Kartalarni metropoliten bekat kassalaridan va maxsus kartamotlardan harid qilish imkoniyati mavjud. Kartalarning foydalanish muddati 3 yil etib belgilangan. Bu borada qo‘shimcha ma’lumotlar ATTO saytida mavjud. Bundan tashqari, Toshkent shahar mehmonlari va metropoliten xizmatidan kam foydalanuvchi yo‘lovchilarga bir martalik QR-kodli chiptalar joriy qilingan. Ijtimoiy tarmoqda o‘tkazilayotga maxsus so‘rovnoma natijalari asosida 2022-yil mart oyidan faqat metroda imtiyozli yurishni kafolatlayligan oylik kartalari (yuqoridagi to‘lov tizimlariga qo‘shimcha) joriy etilishi rejalashtirilgan va bu orqali kassalar oldidagi tirbandliklarni bartaraf etish ko‘zlangan”, — deyiladi xabarda.

Shu o‘rinda, Toshkent metropoliteni mavjud bo‘lgan kamchiliklarni ko‘rsatib bera olgan “Daryo” jurnalistiga o‘z minnatdorchiligini bildirgan.