Qashqadaryo hokimi o‘rinbosariga tegishli Trailblazer bir vaqtning o‘zida uchta qoidabuzarlik sodir etdi (video)

Qashqadaryoda viloyat hokimi o‘rinbosariga tegishli xizmat avtomobili bir vaqtning o‘zida uchta qoidabuzarlik qilgani aks etgan video tarqaldi, deya xabar berdi “Daryo” muxbiri.

Ma’lum bo‘lishicha, mazkur video qashqadaryolik avtobloger Maqsud Muzaffarovga tegishli Telegram kanalda e’lon qilingan bo‘lib, bu haqda jamoatchilikni boxabar qilgan bloger viloyat Yo‘l harakati xavfsizligi boshqarmasi boshlig‘iga ham murojaat yo‘llaydi.

“Ushbu avtomashina qoidabuzarligiga nisbatan boshqaruvingizdagi Yo‘l harakati xavfsizligi boshqarmasi chora ko‘ra oladimi?”, — deya savol bergan avtobloger davlat raqami 70 005 DAV bo‘lgan xizmat avtomobilining bir vaqtda uchta qoidabuzarlik sodir etganini aytgan.

“Chevrolet Trailblazer bir vaqtning o‘zida uchta qoidabuzarlik sodir qildi. Birinchidan, o‘ng tomondagi chiziqdan ortga qayrilib olish uchun shu zahoti chapga qayrildi. Chapga qayrilish vaqtida uzluksiz chiziqni bosgan haydovchi svetoforning qizil chirog‘ida ham harakatini davom ettirdi. Demak, bir vaqtning o‘zida uzluksiz chiziqni bosish, ortga qayrilish qoidasini buzish va svetoforning taqiqlovchi chirog‘ida harakatni davom ettirishni ko‘ryapmiz”, — deydi avtobloger.

Qashqadaryo viloyati hokimligi axborot xizmati rahbari Ahror Sodiqovning 2021-yil 30-iyul kuni Telegram kanalida e’lon qilgan xabariga ko‘ra, hukumat qarori bilan viloyat, tuman va shahar hokimlari hamda ularning o‘rinbosarlariga yangi tipdagi DAV partiyali davlat raqami berilgan. Ahror Sodiqovning davlat raqami 70 006 DAV, 70 009 DAV bo‘lgan xizmat avtomobillari rasmini ulashganidan anglashilishicha, 70 005 DAV ham viloyat hokimligi mas’ullaridan biriga tegishli ekani oydinlashadi.

“Daryo” muxbiri bilan subatlashgan manba mazkur xizmat avtomobili viloyat hokimining qishloq va suv xo‘jaligi masalalari bo‘yicha birinchi o‘rinbosari Ulug‘bek Uzoqovga tegishli ekanini bildirdi.