Bugun,

  • USD 11095.31
  • RUB 173.84
  • EUR 10772.44

Ayrim ijodkorlar fikricha, salbiy rollarni ijro etish qiyin, ammo bunday rollarning ko‘pchiligi tomoshabinlar e’tiborini tortadi. Quyidagi ijodkorlar rollarini shunchalik ishonarli ijro etishganki, oqibatda tomoshabinlar “nafrati”ga uchragan.

“Gulchehra Ibrohimbekovani ko‘rgani ko‘zim yo‘q!”

Foto: Instagram / @gulchehra__ibrohimbekova__

Foto: Instagram / @gulchehra__ibrohimbekova__

Aktrisa Ibrohim Rasulovning “Begona bahor” filmida qattiqqo‘l qaynona rolini ijro etgan. Film tomoshabinlar e’tiboriga tushgani uchun qaynonaning salbiy fe’l-atvori va keliniga qilgan zulmi keng jamoatchilik tomonidan muhokama etilgan.

— Bu filmdagi rolim haqida yaxshi va yomon gaplarni ko‘p eshitganman. Roldan ta’sirlanib, keliniga zug‘um qilmaslikni anglab yetgan qaynonalar haqida ham ko‘p eshitganman. Yoki aksincha, qaynonam rolingizdagidek deb kelgan kelinlar ham bo‘lgan. Hatto bir necha marta yuzimga “Shu rolingizdan keyin sizni ko‘rgani ko‘zim qolmagan. Tanbal qizingizning boshini silab, kelinni siltadingiz”, degan gaplarni ham eshitganman. Film g‘oyasi hayotiy bo‘lgani uchun ham tomoshabinlarga manzur kelgan. Odatda ijobiy rolga nisbatan salbiy rolning ta’sir etish kuchi ortiqroq bo‘ladi. Agar ijroyimdagi qaynonani ko‘rib, o‘ziga tegishli xulosa chiqarib olganlar bo‘lsa, bundan quvonaman.

Shamsiqamar Mansurovani yaxshi qizlarga o‘xshatishmagan

Foto: Instagram

Foto: Instagram

Aktrisa 1972-yil suratga olingan “Bahor qaytmaydi” videofilmida kichik epizod rol ijro etgan. Alimardon To‘rayevning ma’shuqasi roli ko‘plab muhokamalarga sabab bo‘lgan.

— Sochim hamisha kalta bo‘lgan, uzun va keng ko‘ylak kiyishni ham yoqtirmaganman. Shu sabab ko‘pchilik rejissorlar salbiy rollarga taklif etishardi. “Bahor qaytmaydi” videofilmida suratga tushishimga ham kalta sochim sabab bo‘lgan. Unda kichik sahnada suratga tushganman, ammo tomoshabinlarga jiddiy ta’sir etgan. Rosti, bir muddat ko‘cha-ko‘yda yurolmay qolganman. Rolimni qoralashgan, hatto qo‘llari bilan ko‘rsatgan paytlari ham bo‘lgan. Albatta, bu rolning ishonchli chiqqanidan darak beradi, ammo baribir ko‘pchilikning orasida noqulay vaziyatga tushish menga alam qilgan. Hatto, bir kuni tramvayga chiqmoqchi bo‘lganimda bir nechta ayollar men bilan ketishni istamay, haydovchiga eshikni yoping, deb baqirishgan. O‘shanda salbiy rolning yukini ko‘tarish naqadar og‘ir ekanligini anglaganman.

Barchin G‘ofurovani bo‘g‘ib o‘ldirishmoqchi

Foto: Instagram / @barchin_gafurova

Foto: Instagram / @barchin_gafurova

Aktrisa “Milliy” telekanalida namoyish etilayotgan “Baxt ovchisi” serialida erkaklarni yo‘ldan uruvchi, o‘z manfaati yo‘lida hech narsadan hayo qilmaydigan Zulya rolini ijro etgan. Yengiltak ayol roli ko‘plab muhokamalarga sabab bo‘lmoqda.

— “Baxt ovchisi” serialidan so‘ng Instagram profilimga tinimsiz haqoratli so‘zlar yozadigan bo‘lishdi. Hatto ba’zi ayollar ochiqdan ochiq “Sizni bo‘g‘ib o‘ldirmoqchiman!” deb po‘pisa ham qilishdi. Yashirmayman, mazkur serialdagi Zulya roli ko‘pchilikni nafratlantirdi. Agar ijroyim orqali tomoshabinlarni ishontirolgan bo‘lsam, xursandman. Ko‘pchilik rolimdan nafratlanadi, ammo hayotda uchratgach “Boshqacha inson ekansiz. Nega bunaqa rol ijro etdingiz?” deyishadi. Yashirmayman, serial efirga ketishni boshlagandan buyon yaqinlarimga nisbatan ham tanqid toshlari otilmoqda. Nachora, odamlar bir kun rol shunchaki ijro ekanligini tushunib yetishlariga umid qilaman, — deydi Barchin G‘ofurova.

Mirolim Qilichevning ustidan onasiga shikoyat qilishgan

Foto: Instagram / @mirolim_qilichev_official

Foto: Instagram / @mirolim_qilichev_official

Aktyor Mirolim Qilichev 2019-yilda “Zalolat” serialida suratga tushgan. Uning qahramoni Muxtor qaynakasidan o‘ch olish uchun ayolini yo‘ldan uradi. Oxir-oqibat oila parokanda bo‘lib, Muxtorning qistovi bilan ayol eridan voz kechib, ichkilikka ruju qo‘yadi.

— “Zalolat” seriali efirga uzatilayotgan paytda xalq orasida yurishga iymanganman. Chunki “Muxtorning afti qursin. Shunaqa ham odam bo‘ladimi? Sizga yarashmabdi”, degan gaplarni har kuni eshitardim. Bir kuni xizmatda onaxonga kelin-kuyovlarni tabriklash uchun navbat bersam, Muxtorning qilmishlarini muhokama qilib ketgandi. Ammo eng yomoni onamga borib, rolim ustidan shikoyat qilishgani bo‘lgan. Aslida bu serialda suratga tushishni istamagandim, rejissor iltimos qilgani uchun rad etolmaganman. Ammo ijro etgan rolimdan afsuslanmayman, — deydi Mirolim Qilichev.

“Mashhura Zulfiqorova, erim bilan yurmang”

Foto: Instagram / @mashhurazulfiqorova

Foto: Instagram / @mashhurazulfiqorova

Aktrisa, asosan, salbiy rollarda suratga tushadi. Shu yili u ishtirok etgan “Daydi qizning daftari” seriali ham ko‘plab muhokama va tanqidlarga sabab bo‘ldi. Uning qahramoni Xurshida qizi Taxminani o‘zi tanlagan taqdir yo‘lidan yurishini va yengil pul topishini istaydi.

— Aslida ijobiyga nisbatan, salbiy rolni yaratish qiyin. Ammo buni hamma ham to‘g‘ri tushunmaydi. Ekrandagi qiyofangizga qarab, sizni shunday inson deb biladiganlar ham ko‘p. Yaqinda qiziq voqea bo‘ldi. Do‘konga kirsam bir ayol yonimga kelib, “Sizni juda yomon ko‘raman, hatto erim siz suratga tushgan serialni ko‘rib o‘tirgan bo‘lsa ham rashk qilaman”, deb biroz qo‘pol muomala qildi. Unga bosiqlik bilan hayotda hamma yaxshi bo‘lmaganidek, seriallarda ham yomon ayollar bor. Ularning rolini kimdir ijro etishi kerak-ku, dedim. Bu gapimdan keyin ayol biroz xijolat bo‘lib uzr so‘radi. Bu voqeadan avval esa Instagram’ga mashinada tushgan rasmimni qo‘ysam, “Erimning mashinasida nima qilyapsiz? Meni bolalarim bor” kabi g‘alati xabarlar ham kelgandi. Go‘yoki bunday mashina faqat o‘sha ayolning erida bordek. Bu juda g‘alati va kulgili holat. Aktrisa o‘z nomi bilan ijrochi. U hayotda ham shunday inson degan gap esa haqiqatga to‘g‘ri kelmaydi, — deydi aktrisa.

Feruza Sobitovaning “detdom”dagi bolasi

Foto: Instagram

Foto: Instagram

Aktrisa shu kungacha ko‘plab salbiy rollarni ijro etgan. Ammo Shohruh reperning “Bolaligim” klipidagi ishtiroki ko‘plab muhokamalarga sabab bo‘lgan. U klipda yengiltabiat ayol rolini ijro etgan.

— Klipdan keyin ko‘pchilik yoshi ulug‘ ayollardan tanbeh eshitganman. Hatto ko‘cha-ko‘yda yonimga kelib, “Es-hushingni yig‘ib, “detdom”dagi bolangni qaytarib ol, uvoliga qolasan”, deganlar ham bo‘lgan. To‘g‘risi, bu gaplarni eshitib g‘alati ahvolga tushardim. Balki, klip suratga olingan paytda tomoshabinlar meni yaxshi tanishmagani uchun shunday hangomalar bo‘lgandir. Ammo hozir bunday voqealar bo‘lmaydi. Faqatgina salbiy rollardan keyin “Bo‘ldi, bunday rol o‘ynamang, sizga yaxshi ayollarning roli ham yarashadi”, degan gaplarni eshitaman, — deydi Feruza Sobitova.

Gulnora Tolipova baqiroq qaynona obrazi bilan tomoshabinlar nafratiga uchragan

Foto: Instagram / @gulnoraxon_888

Foto: Instagram / @gulnoraxon_888

Aktrisa “Jurnalist” serialida baqiroq qaynona rolini ijro etgandan so‘ng tomoshabinlar nafratiga uchragan. Uning keliniga kun bermas, o‘g‘lini ham muammolarga ko‘mib tashlagan ona roli ko‘plab muhokamalarga sabab bo‘lgan.

— “Jurnalist” seriali efirga berilayotgan payt “Chorsu” bozoriga ro‘zg‘orlik qilish uchun bordim. Hamma xaridorlar singari kartoshkaning narxini so‘rasam, sotuvchi ayol jahl bilan “Senga kartoshka sotmayman”, degan. Gapidan hayron bo‘lib tursam “Uyatsiz birovning qizini ham shunchalik xo‘rlaysanmi? Malika indamay xizmatingni qilyapti-ku”, desa bo‘ladimi?! Men ham asli bozorchi bo‘lganim uchun bo‘sh kelmaganman. O‘rtada rosa bahslashuv bo‘lgan. U menga kartoshka otib, “Chorsu”ga ortiq qadam qo‘ymasligimni aytgandi. Undan keyin “Shukrona” serialida o‘g‘lining hayotini buzib, ikkinchi xotin olib beradigan ona rolini ijro etganman. Serial tugagach, ko‘chada bir ayol yonimga kelib “Ajab bo‘pti, keliningizning uvoli tutib jinni bo‘lib qoldingiz”, degandi, — deydi aktrisa.

“Ma’rufxon Muhammedovga qizimni bermayman”

Foto: Instagram / @marufxon_muxammedov

Foto: Instagram / @marufxon_muxammedov

Aktyor 2017-yil suratga olingan “Fitna” serialidagi roli bilan tomoshabinlarga yaxshi tanish. U oilali ayol bilan don olishib, uning oilasi buzilishiga sababchi bo‘ladi. Serialdagi yigit va ayol munosabatlari tomoshabinlar nafratini qo‘zg‘atib, hatto Nozima rolini ijro etgan aktrisa Feruza Normatovaga nisbatan ham tanqid toshlari otilgandi.

— Asli aktyor emas, savdogarman. “Fitna” serialidan so‘ng bozorlarga borishga uyalib qolganman. Chunki ko‘pchilik tomoshabinlar rolim haqida salbiy fikr bildirishgan. “Shunchalik ham bo‘lasizmi, ikkita bolaning uvolidan qo‘rqmadingizmi? Chiroyli bola ekansiz, o‘z tengingizni topardingiz?” kabi ko‘plab tanqidlarni eshitganman. Ammo eng yomoni onam sovchilikka borgan joylar  “O‘g‘lingizning ayollarga suyagi yo‘q-ku, rolni ishonarli o‘ynagan. Demak, hayotda ham shunday bola”, deyishgan. Rol sabab ancha xonadonlardan rad javobini olganmiz. Shukrki, taqdirim boshqa inson bilan ekan. Oila qurdim, farzandli bo‘ldim. Tomoshabinlarning ham men haqimdagi yomon fikrlari unutildi, — deydi Ma’rufxon Muhammedov.

Jayronaning mashinasi balonini teshib ketishgan

Foto: Instagram

Foto: Instagram

Yosh aktrisa Jayrona ko‘plab film va seriallarda salbiy rollarni ijro etgan. Ayniqsa, “Qora atirgul” serialidagi Munira rolidan keyin tomoshabinlar nafratiga uchragan, desak ham bo‘ladi.

— “Qora atirgul” serialidan keyin tanqidlar bo‘ronida qolganman. Sabinaning hayotiga achingan tomoshabinlar Munirani qarg‘ab, haqorat qilishardi. Hatto oldimga kelib “Birovni oilasini buzib charchamadingizmi?” deganlar ham bo‘lgan.  Bir marta Spark rusumli avtomobilimning balonini teshib ketishgan. Haqoratli so‘zlarni kuniga kamida 10-15 ta jo‘natishardi. Hurmatli tomoshabinlar, salbiy rolga ishondingizmi, demak, aktrisa mahoratli — yo‘qsa sizni ishontirolmagan bo‘lardi, degim keladi. Ammo buni hamma ham tushunavermaydi-da.

Fotima Berdiyeva Taxmina obrazini yaratganidan afsusda

Foto: Instagram / @fotimaberdiyevaofficial

Foto: Instagram / @fotimaberdiyevaofficial

“Daydi qizning daftari” filmida Taxmina rolini ijro etgan. Fohishalik yo‘liga kiradigan yosh qiz tomoshabinlar g‘azabiga uchradi, ayrimlar uni jabrdiyda, boshqalar esa ustomon qiz deb ta’riflashdi.

— Ba’zi insonlarda aktrisaga roliga qarab munosabat bildirishadi. Bu noto‘g‘ri! Taxmina rolidan keyin ko‘plab gap-so‘zlar tarqaldi. Hatto men bilan suratga tushgan aktyorning ayoli bilan biroz tortishib qoldik. Rolim (ijroyim emas) ko‘plab tanqidlarga uchradi. Gap-so‘zlar ota-onamga ham qaratilgani uchun rolga rozilik berganimga biroz afsuslandim. Shu bois ortiq rol ijro etmaslikka qaror qildim. Balki, kun kelib bu fikrimdan qaytarman yoki yo‘q. Buni vaqt ko‘rsatadi. Ammo rol bilan hayotni aralashtirib yuborishlari meni biroz ranjitdi.

Asolat Tursunovaga tarsaki tushirishgan

Foto: Instagram / @asolat_tursunova

Foto: Instagram / @asolat_tursunova

Aktrisa Asolat Tursunova “Qodirxon” serialida ayyor, ustomon kelin rolini ijro etgan. Uning roli ko‘plab muhokamalarga sabab bo‘ldi.

— Serial namoyish etilgandan so‘ng, ko‘chada notanish inson yuzimga tarsaki tushirgan. Kutilmagan zarbdan o‘zimni yo‘qotib, uyga yig‘lab kelganman. O‘shanda ustozimiz rahmatli Mirza Azizovning “Shu rolni o‘ynadingizmi xalq toshbo‘ron qilishiga ham chidashingiz kerak”, degan gaplarini esladim. Ustozning oxiratlari obod bo‘lsin.

Izoh
Asosiy yangiliklar
Madaniyat
“Xudodan qo‘rqmagan odamdan qo‘rqdim”. O‘zbekiston xalq artisti Bobomurod Hamdamov oilaviy nizolar tufayli ijara uyda yashamoqda (video)
Mahalliy
“Odamlar o‘limida o‘zimni aybdor hisoblamayman” — Nukusdagi tartibsizliklar yetakchisi Dauletmurat Tajimuratov
Mahalliy
Samarqandda o‘quvchining onasi “zamdirektor”ni kaltakladi