Yodingizda bo‘lsa, 10-15 yillar avval xususiy filmlar ommalashganda rejissorlar yoppasiga mashhur qiyofalardan foydalanishni boshlashdi. O‘shanda xonanda, raqqosa, hatto dizaynerlar ham filmlarda asosiy qahramonlar rolini ijro etishgan edi. “Chumchuq so‘ysa ham qassob so‘ysin”, deganlaridek, omadsiz ijrolar ham ko‘paygan. Quyida sizga filmda suratga tusholmasligini anglab yetgan ijodkorlarni tanishtirib o‘tamiz.
Rayhon
Aslida “Kechir” filmidagi Samira Rayhonning ilk roli emas. U xonandalik faoliyatidan avval 1999-yili suratga olingan “Zanjir” serialida Nargiza rolini ijro etgan. Undan keyin musiqiy filmlarda suratga tushdi. 2007-yili esa “Kechir” drama filmida Samira rolini ijro etdi. Ba’zi ma’lumotlarga ko‘ra, u filmning ssenariy muallifi va prodyusseri ham hisoblanadi. Film kutilganidek muvaffaqiyatli chiqmagani uchunmi yoki boshog‘riqlari sababmi Rayhon ortiq film suratga olmaslikka va rol ijro etmaslikka ahd qilgan.
Lola Ahmedova
O‘zbekistonda xizmat ko‘rsatgan artist Lola Ahmedova 2004-yil suratga olingan “Muhabbatimsan” filmida bosh rolni ijro etgan. Ammo film xonandaning ijodiy faoliyatiga jiddiy ta’sir ko‘rsatmagan.
— Filmda suratga tushishni istamaganman. Tabiatan tortinchoq bo‘lsam, kadrda rol ijro etolmayman, deb taklifni rad etgandim. Shunda rahmatli aktyor Mirza Azizov “Men sizga yordam beraman, rolni zo‘r qilib o‘ynaysiz”, deb motivatsiya bergandi. Mana shu inson sabab rolni qabul qilganman. Ammo suratga olish maydonchasida qiyinchiliklar bo‘lgan. Shu bois ortiq filmlarda suratga tushmaslikka jiddiy ahd qilganman, — deydi xonanda Lola Ahmedova.
Nilufar Usmonova
Nilufar Usmonova “Muhabbat sinovlari” filmidan so‘ng Zebo Navro‘zovaning “Bo‘rilar” filmida asosiy rollardan birini ijro etgan. Ammo unday keyingi takliflarni rad etdi.
— Men aktrisa emasman, shu bois rol uchun sarflagan energiyamni yangi qo‘shiqlar yaratishga yo‘naltirganim ma’qul, — deydi xonanda.
Ziyoda “Ijarachilar”
O‘zbekistonda xizmat ko‘rsatgan artist Ziyoda ijodining ilk yillarida ko‘plab filmlarda suratga tushgan. U “Boyvachcha”, “Achchiq hayot”, “Nortoy”, “Bekorchilar makoni”, “Enagalar”, “Ijarachilar” va “Uchrashuv” filmlarida rol o‘ynagan. U Jahongir Poziljonovning komediya filmlarida navbatchi aktrisa bo‘lgan, desak xato bo‘lmaydi. Ammo xonanda keyingi paytlarda filmlarda suratga tushayotgani yo‘q. Uning vaqti tig‘iz, balki ortiqcha reklamaga ham zarurat sezmayotgandir.
Nigora
Ilgari Nigora ham filmlarda faol bo‘lgan. U Jahongir Poziljonovning “Boyvachcha”, “Shomurod va Durdona” va “Oling quda, bering quda” filmlarida bosh rollarni ijro etgan.
— Hozir uchta bola va xalq xizmatidan ortib, filmda suratga tushishga vaqtim yo‘q. Menimcha, avvalgidek filmlar ham suratga olinmayapti, — deydi xonanda Nigora.
Ruhshona
Xonanda Ruhshona qo‘shiqlari ommalashmasidan avval “Bekorchilar makoni”, “Enagalar” va “Xizmat doirasidan tashqari” filmlarida suratga tushgan. So‘nggi filmida xonanda Guli rolini ijro etgan.
— Filmlarda suratga tushishini yoqtiraman. Uzoq tanaffusdan keyin Dilshod Ahmedovning “Xuligan” serialida suratga tushyapman. Suratga olish maydonchasiga borib, rol o‘ynashni sog‘inganimni his qildim, — deydi xonanda Ruhshona.
Ulug‘bek Rahmatullayev
O‘zbekistonda xizmat ko‘rsatgan artist Ulug‘bek Rahmatullayev 2005-yilda “Nahotki sen” filmida talaba yigit epizod rolida suratga tushgan. Undan so‘ng “Voy-dod sumalak” va “Ada emas, dada” filmlarida suratga tushgan. Eng so‘nggi rolini esa 2012-yilda suratga olingan “Aql va yurak” filmida ijro etgan. Mazkur filmda undan tashqari Zarina Nizomiddinova, Munisa Rizayeva, Alisher Uzoqov va Sevara Soliyeva ham suratga tushishgan.
Munisa Rizayeva
Munisa Rizayeva ilk bor 2010-yilda rejissor Yodgor Nosirovning “Hijron” filmida rol ijro etadi. Undan so‘ng “Firibgar”, “Hay-hay qizaloq”, “Aql va yurak”, “Kichkina xo‘jayin”, “Salom, Natasha”, “Nafs” va singari kinolardagi turli xarakterdagi rollari orqali aktrisa sifatida tomoshabinlar e’tiborini qozonadi. Ammo xonanda “Kichkina xo‘jayin” va “Salom, Natasha” filmlarida rol ijro etganidan afsuslanishini aytgandi.
Lola
Xonanda Lola Yo‘ldosheva ilk rolini 1999-yili suratga olingan “Navro‘z ayyomi” myuziklida suratga tushgan. Undan so‘ng “Sevinch”, “Kelgindi kuyov”, “Yarim baxt”, “Jodugar”, “Yondiradi-kuydiradi”, “G‘aroyib orzular” va “Bu telba muhabbat yoxud Farhod va Shirin” filmlarida suratga tushgan. Afsuski, xonanda 2014-yildan buyon birorta filmda suratga tushayotgani yo‘q.
Shahzoda
Xonanda Shahzoda ilk rolini 2000-yili suratga olingan “Tohir va Zuhra” musiqali filmida ijro etgan. Undan so‘ng “Sevinch”, “Sarvinoz”, “Fotima va Zuhra”, “Zumrad va Qimmat”, “Majruh”, “Nafs” va “O Maryam, Maryam” filmlarida suratga tushgan. So‘nggi rolini 2016-yili suratga olingan “Navro‘z muborak” myuziklida ijro etdi.
Manzura
Xonanda Manzuraning filmografiyasi aktrisalarnikidan kam emas. U ilk rolini 2000-yili suratga olingan “Tohir va Zuhra yangi talqinda” myuzklida ijro etgan. Undan so‘ng “Muhabbat sinovlari”, “Nahotki sen”, “Sevginator” kabi filmlarda suratga tushgan. Ayniqsa, “Sevginator” filmidagi Malomat roli tomoshabinlar tomonidan iliq qarshi olingan.
Sharof Muqimov
Sharof Muqimov ilk rolini 2002-yilda Muhammad Ismoil ssenariysi asosida suratga olingan “Balog‘at bekati” filmida ijro etgan. Mazkur film “Assalom, O‘zbekiston” ko‘rsatuvida bir necha qismlarga bo‘lib namoyish etilgan. Undan so‘ng Burhon Sharopovning “Jonim seni yoxud egizaklar”, “Niqob” filmlarida, rejissor Muzaffar Erkinovning “Armon” filmlarida suratga tushdi. 2015-yilda sobiq turmush o‘rtog‘i Sevinch Mo‘minova bilan birga “Baxt ortidagi dard” filmida suratga tushdi.
Shohruhxon
Xonanda Shohruhxon ilk rolini 2006-yilda “Rameo va Juletta yoxud la’natlangan sevgi” filmida ijro etgan. Undan so‘ng “Yarim baxt”, “Aprel-may”, “Bo‘rilar”, “Quvg‘in”, “Shaharlik olifta”, “Oxirgi qarz”, “Sog‘inch”, “Erka kuyov” va “Sen ketma” kabi filmlarda suratga tushgan.
Sevinch Mo‘minova
Xonanda Sevinch Mo‘minova xonandalik faoliyati boshlamasdan avval 2002-yilda kinorejissor Qamara Kamolovaning “Dilhiroj” filmida suratga tushgan. Undan so‘ng “Baxt uchun million”, “Sunami” va “Baxt ortidagi dard” filmlarida asosiy rollarni ijro etgan.
Dilniyoz G‘afforov
“Eldido” guruhi vakili Dilniyoz G‘afforov asli mutaxassisligi bo‘yicha aktyor, shu bois unga filmlarda suratga tushish qiyinchilik tug‘dirmaydi. U “Sevgi farishtasi”, “So‘nggi nafasimgacha”, “Kunlardan bir kun”, “Andijoncha muhabbat” filmlarida suratga tushgan. Dilnoza Kubayeva bilan suratga tushgan filmi tomoshabinlar tomonidan iliq qarshi olingan.
Izoh (0)