2021-yilning 31-dekabrida Samarqand shahridagi Bo‘stonsaroy va Ro‘dakiy ko‘chalari kesishmasida barpo etilgan tunnelning ochilish marosimi bo‘lib o‘tgan edi. Shahardagi tirbandliklarni qisqartirish maqsadida avtomobillar qatnovi uchun rasmiy foydalanishga topshirilgan tunnel 143 milliard so‘mga barpo etilgan.
Foydalanishga topshirilganligiga bir hafta bo‘lmagan ushbu tunnelda 2022-yil 3-yanvardan 4-yanvarga o‘tar kechasi yog‘gan yomg‘ir natijasida suv sizib chiqa boshlagan.
“Daryo” muxbiri tunneldan suv sizib chiqayotgan holatni o‘rgandi. O‘rganish jarayonida o‘zini tanishtirishni istamagan qurilish xodimi tunneldan sizib chiqayotgan suv mazkur obyekt atrofidagi ko‘kalamzorlashtirilgan bog‘ning yeridan o‘tgan bo‘lishi mukinligini bildirdi. Quruvchi sizib chiqayotgan suv loyqa ekanligini, bir sutka davomida yog‘gan yomg‘irning suvi yumshoq tuproqqa aralashib, loyqa bo‘lib oqayotganini ta’kidladi.
Samarqand shahar hokimligi axborot xizmati rahbari Abdujabbor Po‘latov tunnel ochilish marosimiga jurnalist va blogerlarni taklif qilishda aholiga qulaylik yaratish maqsadida mazkur tunnelning transport vositalari harakatlanadigan qismida ishlar deyarli yakunlangani bois rasmiy ochilish marosimi o‘tkazilishini ma’lum qilgan.
Abdujabbor Po‘latov e’lon qilgan xabarda tunnelga tutash bo‘lgan yerosti va yerusti piyodalar o‘tish yo‘li hamda ko‘kalamzorlashtirilishi rejalashtirilgan joylarda ishlar davom etaverishi va transport vositalarining harakatiga ta’sir qilishiga besabab yo‘l qo‘yilmasligini bildirgan.
Samarqand viloyati hokimining matbuot kotibi — axborot siyosati masalalari bo‘yicha maslahatchisi Manuchehr Mirzayev obyekt hali Qurilish vazirligi tasarrufida ekanligini ma’lum qildi. Shuning uchun holat yuzasidan rasmiy izohni ular berishini, Qurilish vazirligi matbuot kotibiga holat aytilganligini bildirib o‘tdi.
“1-Ko‘prik qurilish otryadi” direktor o‘rinbosari Azimbek Mirzayevning bildirishicha, yangi tunnel devorlaridan suv sizib chiqishining ko‘prikning konstruksiyaviy qismiga hech qanday zarari yo‘q. Irrigatsiya tarmoqlarining to‘liq ishga tushmagani sababli shunday holat yuz bergan. Yanvar oxiriga qadar ishlar yakuniga yetkazilganidan so‘ng bunday holat takrorlanmaydi.
Ma’lumot uchun, tunnel qurilishi 2019-yil oxirida boshlangan. Ushbu qurilish 2022-yilda bo‘lib o‘tishi rejalashtirilgan Shanxay hamkorlik tashkiloti sammitidan oldin shahar ko‘chalarini rekonstruksiya qilish bo‘yicha keng ko‘lamli ishlar doirasida amalga oshirilgan.
Umumiy qiymati 143 milliard so‘mni tashkil etgan hamda to‘liq davlat budjeti hisobidan moliyalashtirilgan ushbu tunnel “O‘zbekiston temir yo‘llari” AJ “Ko‘prikqurilish” tresti UK tomonidan amalga oshirilgan. Telegram’dagi “Davletovuz”ning yozishicha, loyihaning amalga oshirilishiga tendersiz ruxsat berilgan.
Hukumat qarori bilan loyihachi, pudratchi tashkilotlarni to‘g‘ridan to‘g‘ri eng yaxshi takliflar asosida tanlovlarsiz belgilab olishga mutasaddi vazirliklar, idoralar hamda Samarqand viloyati hokimligiga, istisno tariqasida ruxsat berilgan. Shuningdek, qurilish-montaj, ta’mirlash, rekonstruksiya ishlari loyiha-smeta hujjatlarini tayyorlash bilan bir vaqtda amalga oshirilishiga ham ruxsat berilgan.
2022-yilning 1-yanvarida “O‘zbekiston24” tomonidan namoyish etilgan ushbu tunnel ochilish marosimi haqidagi videolavhada reja bo‘yicha 3 yilda qurilishi lozim bo‘lgan tunel 1,5 yil ichida, 1 yil ichida qurilishi lozim bo‘lgan galeriya tipidagi yo‘l o‘tkazgich esa 6 oyda foydalanishga topshirilishiga erishilgani ta’kidlangan.
“Ko‘prikqurilish” Tresti matbuot xizmatining ma’lum qilishicha, tunnel tipidagi mazkur yo‘l o‘tkazgich asosiy qurilish-montaj ishlari yakunlanib, Samarqand shahri aholisiga yangi yil bayram tadbirlari davrida tirbandlikni oldini olish va transport vositalari harakatlanishiga qulaylik yaratish maqsadida ochib berilgan bo‘lib, obodonlashtirish va suv qochirish, irrigatsiya tarmoqlarida hali qurilish ishlari davom ettirilmoqda.
Tonnel qismining devorlaridan suv o‘tish holati hali qurilish ishlari davom ettirilayotgan suv qochirish-irrigatsiya tizimidagi lotoklarga har xil turdagi tiqilishlar oqibatida yuzaga kelgan. Tunnel devorlariga o‘rnatilgan plitalar “quruq montaj” usulida ishlangan bo‘lib, ularning orasidan suv o‘tishi yo‘l o‘tkazgichning konstruktiv elementlari mustahkamligiga salbiy ta’sir etmaydi.
Loyiha yechimiga ko‘ra ushbu transport yechimi qurilishi doirasida yomg‘ir suvlarini qochirish uchun nasoslar o‘rnatilishi va oraliq qurilmalar tutashish joyida asfalt qoplamasini kesib, deformatsion choklar o‘rnatilishi ko‘zda tutilgan. Yaqin kunlarda qayd etilgan ishlar to‘liq yakunlanib, yuzaga kelgan noxush holatlar bartaraf etiladi.
Izoh (0)