O‘zbekistonda fuqarolarni yashash joyi bo‘yicha hisobga olish tizimini soddalashtirish uchun budjetdan tashqari mablag‘lar hisobidan 3 milliard so‘m ajratiladi. Bu haqda prezidentning “2022-2026-yillarda Yangi O‘zbekistonni rivojlantirishning strategiyasi to‘g‘risida”gi farmoni loyihasida qayd etilgan.
Hujjat loyihasida keltirilishicha, fuqarolarni yashash joyi bo‘yicha hisobga olish tizimini yanada soddalashtirish va aholiga qo‘shimcha qulayliklar yaratish, ushbu yo‘nalishda boshlangan islohotlarni yakuniga yetkazish belgilangan.
Shu bilan birga, fuqarolarni Toshkent shahri va Toshkent viloyatida doimiy propiska qilish tartibi ham moslashtirilmoqda. Kelgusida fuqarolarni yashash joyi bo‘yicha hisobga olishning yagona elektron tizimi ham joriy etiladi.
Bundan tashqari, fuqarolarning shaxsiy biometrik ma’lumotlarini olish, saqlash va ulardan foydalanish amaliyoti yo‘lga qo‘yiladi.
Avvalroq O‘zbekistonda propiska uchun taqdim qilinadigan hujjatlar ro‘yxatidan uy-joy hujjatlari chiqarib tashlangani to‘g‘risida xabar berilgandi. Fuqarolarni doimiy yashash joyi bo‘yicha ro‘yxatga olish, bekor qilish va vaqtincha turgan joyi bo‘yicha ro‘yxatga olish xizmatlari migratsiya va fuqarolikni rasmiylashtirish bo‘linmalari, davlat xizmatlari markazlari yoki Yagona ijtimoiy davlat xizmatlari portali orqali amalga oshiriladi.
Izoh (0)