O‘zbekistonda farzandi xususiy bog‘cha va maktablarga boradigan fuqarolarga soliq imtiyozi beriladi

O‘zbekistonda nodavlat maktabgacha ta’lim tashkilotlari va maktablarga farzandlarini yuborayotgan ota-onalar daromad solig‘idan ozod etilishi mumkin. Bu haqda “Yangi O‘zbekistonning 2022–2026-yillarga mo‘ljallangan taraqqiyot strategiyasi to‘g‘risida”gi prezident farmoni loyihasida so‘z boradi.

Taraqqiyot strategiyasida ta’lim sifatini oshirish bo‘yicha 2022-yilda amalga oshirilishi belgilangan vazifalar ham mavjud. Xususan, 1-apreldan boshlab nodavlat maktabgacha ta’lim tashkilotlari va maktablarga farzandlarini yuborayotgan ota-onalarning 3 million so‘mgacha bo‘lgan to‘lovlari daromad solig‘idan ozod etiladi.

Farmon loyihasida Moliya vazirligiga Davlat soliq qo‘mitasi bilan birgalikda bir oy muddatda Soliq kodeksi va boshqa qonunchilik hujjatlariga tegishli o‘zgartirish kiritishni nazarda tutuvchi loyihalarni Vazirlar Mahkamasiga kiritish yuklangan.

Shu bilan birga, maktab o‘quvchilarini kasb-hunarga o‘qitish bo‘yicha davlat buyurtmasi asosida umumta’lim maktablari kasb o‘rganish istagidagi bitiruvchilarini davlat tomonidan kamida bir kasbni egallashiga ko‘maklashuvchi tizim joriy etiladi.

Shuningdek, 2022–2026-yillarga mo‘ljallangan taraqqiyot strategiyasini 2022-yilda amalga oshirish bo‘yicha “yo‘l xaritasi” loyihasida keltirilishicha, 2022-yil yakuniga qadar 6 yoshli bolalarni maktabgacha tayyorlov tizimi bilan qamrab olish darajasini 90 foizga yetkaziladi. Davlat maktabgacha ta’lim tashkilotlarida quyidagi guruhlar tashkil qilinadi: to‘liq kunlik guruhlar; qisqa muddatli guruhlar; majburiy bepul tayyorlov guruhlari.

Maktabgacha ta’lim tizimiga xususiy sektor mablag‘larini jalb qilish orqali yangi nodavlat maktabgacha ta’lim tashkilotlari tashkil etiladi. 2022-yilda davlat-xususiy sherikchiligi asosidagi 1300 ta nodavlat maktabgacha ta’lim tashkilotlari hamda oilaviy maktabgacha ta’lim tashkilotlari faoliyati yo‘lga qo‘yiladi.

Bundan tashqari, Maktabgacha ta’lim tizimida ta’lim sifatini yangi bosqichga olib chiqish ham ko‘zda tutilgan. Bog‘cha xodimlarining professional tayyorgarligi va mahoratini oshirib borishning takomillashtirilgan tizimi joriy etiladi. Maktabgacha ta’lim tizimi xodimlarining malakasini oshirish shakl va metodikalari xalqaro tajriba asosida qayta ko‘rib chiqiladi.

Hududlarda davlat va nodavlat maktabgacha ta’lim tashkilotlari rahbar va pedagog kadrlarining kredit-modul tizimiga asoslangan uzluksiz malaka oshirish tizimi joriy etiladi. Maktabgacha ta’lim tizimi boshqaruv kadrlari zaxirasini maqsadli o‘qitish tizimi yo‘lga qo‘yiladi.

Eslatib o‘tamiz, 2021-yilning oktabr oyida Shavkat Mirziyoyev Toshkent shahri aholi bilan uchrashuvda poytaxt maktablaridagi ta’lim sifati va bolalar tarbiyasi masalasiga to‘xtalib o‘tgandi. O‘shanda davlat rahbari ayrim shahar maktablarida bitta sinfda 45-50 tagacha bola o‘qiyotganidan, davlat bog‘chasiga farzandini beraman deb, oylab, hatto yillab navbat kutayotgan oilalar ham borligidan yaxshi xabardor ekanini ma’lum qilgan. Shu sabab Shavkat Mirziyoyev prezidentlik dasturi doirasida farzandlarini xususiy bog‘cha va maktabga bergan ota-onalarga yengilliklar berish taklifini bildirgan edi.