Jahon futboli yulduzlarining transfer bozoridagi narxi ularning maydondagi ko‘rsatayotgan o‘yiniga qarab, tez-tez o‘zgarib turishi millionlar o‘yini ishqibozlari uchun juda bir olamshumul yangilik hisoblanmaydi. Qanchalik g‘alati tuyulmasin, ushbu tendensiya bir mashhur ichimlik suvi nomi bilan ataladigan O‘zbekiston Superligasi futbolchilari uchun ham amal qiladi va Transfermarkt portali ularning transfer narxini reyting qilib boriladi. “Daryo” quyida ana shu reytingning kuchli o‘nligidan joy olgan futbolchilar haqida hikoya qiladi.
Azizbek Turg‘unboyev, “Paxtakor”, 700 ming yevro
2021-yilgi mavsum boshida “Navbahor”dan “Paxtakor”ga o‘tgan Azizbek Turg‘unboyev kutilganidek, juda yorqin o‘yin ko‘rsata olmagan bo‘lsa-da, har xolda poytaxt klubining avvalgi kabi unchalik ham kuchli bo‘lmagan tarkibi ichida yo‘qolib qolmadi. Ortda qolgan mavsumda u 25 ta o‘yinda ishtirok etib, 5 marta o‘z nomini tabloga yozdirib qo‘ydi. Dunyoga mashhur Transfermarkt portali namanganlik yarim himoyachining transfer narxini 700 ming yevroga baholagan. Turg‘unboyevning yoshi (27) va katta ehtimol bilan chet el klublariga yo‘l olmasligi inobatga olinib aytilsa, mazkur narxning ko‘tarilishi amri mahol.
Husayn Norchayev, “Nasaf”, 700 ming yevro
O‘tgan mavsumdan boshlab, “Nasaf”ning asosiy jamoasida muntazam o‘ynab kelayotgan Norchayev bu yilgi birinchilikda tom ma’noda o‘zining nimalarga qodirligini to‘laligicha namoyish qildi. 19 yoshida “Nasaf”ning asosiy figuralaridan biriga aylangan hujumchi ham Superligada, ham xalqaro maydonda to‘purarlik qobiliyatini ko‘rsatdi. OFK Kubogida 7 ta gol bilan musobaqaning eng sermahsul o‘yinchisi bo‘ldi, O‘zbekiston chempionatida esa 13 ta gol bilan Dragan Cheran (16) va Temirxo‘ja Abduxoliqovdan (14) keyin 3-o‘rinni egalladi. Bundan tashqari u O‘zbekistonda 2021-yilning eng yaxshi yosh o‘yinchisi deb topildi.
Umuman olganda Norchayev O‘zbekiston chempionatida o‘z darajasini ko‘rsatib bo‘ldi. Shunday ekan O‘zbekiston chempionatidan “bosh olib ketish” u uchun ham, o‘zbek futboli uchun ham foydadan holi bo‘lmaydi.
Shohruz Norxonov, “So‘g‘diyona”, 750 ming yevro
2021-yilgi mavsumda “So‘g‘diyona” o‘z tarixida ilk marta O‘zbekiston chempionatida kumush medallarga ega chiqdi. Ulug‘bek Baqoyev jamoasining bu natijaga erishishida, shubhasiz, Shohruz Norxonovning hissasi katta bo‘ldi. Uning chempionat bahslarida kiritgan 10 ta goli ham bunga isbot bo‘la oladi. Gollardan tashqari ham Shohruz bir necha mavsumdan beri jizzaxliklar safida barqaror o‘yin ko‘rsatib kelmoqda. Shuningdek, uning aynan “So‘g‘diyona” safida qo‘nim topganini alohida qayd etish kerak. Shohruz ungacha bir necha yillar qisqa muddatdan “Bunyodkor” va “Obod” safida harakat qilgan.
Norxonov hozirda 28 yoshda va agar ushbu sport formasini ushlab tura olsa, bemalol yana bir-ikki mavsum Superliga jamoalarida to‘p sura oladi.
Yovan Jokich, “OKMK” / “Navbahor”, 750 ming yevro
O‘zbekiston chempionatida to‘p surayotgan kam sonli (nisbatan) talabga javob beradigan (mahalliy futbolchilardan kamida “bir kalla” ustun bo‘lishi nazarda tutilmoqda) legionerlardan biri Yovan Jokich 2018-yildan beri serquyosh O‘zbekistonda o‘z nasibasini terib yuribdi. “OKMK”dan tashqari, ma’lum muddat “Lokomotiv”da ham harakat qilgan serbiyalik yarim himoyachi o‘tgan mavsumda “konchilar”ning 3-o‘rinni egallashida muhim o‘rin tutdi.
Shuningdek, u ayni damda 750 ming yevro transfer narxi bilan Superliganing eng qimmat legioneri bo‘lib turibdi.
Tayanch yarim himoyachi zonasida to‘p suradigan Yovich hozirda 29 yoshda va faoliyatidagi yetuklik davrini o‘tkazmoqda. U yangi mavsumni Samvel Babayan qo‘l ostida “Navbahor” safida boshlaydi.
Temurxo‘ja Abduxoliqov, “Lokomotiv”, 750 ming yevro
“Bunyodkor” klubida katta futbolga qadam qo‘ygan Abduxoliqov faoliyati davomida qator mahalliy va xorij klublarida harakat qilishga ulgurgan. Biroq ularning hammasini ham muvaffaqiyatli o‘tgan deyish biroz mushkul. O‘z vaqtida yorqin o‘yinlar ko‘rsatgani tufayli o‘zbek futbolining kelajagi deb nom berilgan Abduxoliqov, afsuski, o‘z salohiyat va imkoniyatlarini to‘laligicha ochib bera olmagan. 30 yoshli hujumchi bir necha yillardan beri Toshkentning “Lokomotiv” klubi sharafini himoya qilib kelmoqda. Uning o‘tgan mavsumdagi statistikasi quyidagicha bo‘ldi: 23 o‘yin, 14 ta gol.
So‘nggi ma’lumotlarga qaraganda, 2022-yilgi mavsumni Abduxoliqov katta ehtimol bilan “Nasaf” yoki “Qizilqum” safida boshlaydi. U “temiryo‘lchilar” bilan shartnomani uzaytirmadi.
Nurillo To‘xtasinov, “Bunyodkor”, 800 ming yevro
Yosh tarkib va maqtanib bo‘lmas darajadagi moliyaviy ahvoli bilan “Bunyodkor” 2021-yilgi mavsumni 5-o‘rinda yakunladi. Yorqin yulduzi va yaqqol yetakchisi bo‘lmagan Shuhrat Maqsudov jamoasida Nurillo To‘xtasinov mavsum davomida barqaror o‘yin ko‘rsatib keldi. Va ko‘p hollarda aynan uning faol harakatlari evaziga “qaldirg‘ochlar” muhim bo‘lgan ochkolarni qo‘lga kiritdi.
Faoliyatining deyarli katta qismini “Bunyodkor”da o‘tkazgan To‘xtasinov hozir 24 yoshda va o‘z jismoniy imkoniyatlaridan kelib chiqib, uzoq yillar O‘zbekiston chempionati klublarida to‘p surishi mumkin.
Hojiakbar Alijonov, “Paxtakor”, 800 ming yevro
“Paxtakor” akademiyasi tarbiyalanuvchisi hisoblangan Hojiakbar 2016-yildan beri asosiy jamoaga jalb etib kelinadi. Alijonov “Paxtakor”ning eng kuchaygan vaqtida ham raqobatni yengib, asosiy tarkib futbolchisiga aylangandi.
Alijonov tezkor va muntazam ravishda hujumlarga qo‘shilishi va o‘yinni o‘ziga olishdan cho‘chimasligi bilan ampulasidagi boshqa futbolchilardan ajralib turadi. U ortda qolgan mavsumda Superliga doirasida 20 ta o‘yin o‘tkazib, 3 ta golli uzatmaga mualliflik qildi.
Sardor Sobirxo‘jayev, “Paxtakor”, 800 ming yevro
Sardor Sobirxo‘jayev o‘z vaqtida Osiyoni titratgan, tarkibida Abbos Maxsitaliyev, Timur Hakimov bo‘lgan o‘smirlar terma jamoasining o‘rtamiyona futbolchilaridan biri edi. Ammo u o‘sha tarkibdan hozir Superligada o‘ynayotgan kam sonlilardan hisoblanadi. Yuqorida ta’kidlanganidek, “Paxtakor” kuchaygan Shota Arveladze davrida ham kuchli raqobatda yo‘qolib qolmagan Sardor, asosan, maydondagi “qora ishlar”ni bajaradi.
U uch-to‘rt himoyachini aldab o‘tmasligi yoki har o‘yinda gol urmasligi mumkin, biroq ziyrak muxlislar biladiki, jamoaning o‘yinini aynan tayanch zonasidagilar belgilab beradi. Yana shuni alohida ta’kidlash joiz, unda intizom borasida ham kamdan-kam hollarda muammo kuzatiladi. Odatda uning pozitsiyasida o‘ynaydigan futbolchilarda kartochkalar soni ko‘payib ketishi bor gap, Sobirxo‘jayev esa o‘z ishini “toza” bajaradi.
Doston Hamdamov, “Paxtakor”, 900 ming yevro
Faoliyati davomida bir necha bor legionerga aylangan va har safar muvaffaqiyatga erishmagan Doston Hamdamov 2021-yilning yozida “Paxtakor”ga qaytdi va mavsumning qolgan qismida “sherlar” safida 12 ta o‘yin o‘tkazib, 2 ta golli uzatmaga mualliflik qildi.
Dostonning transfer narxi ro‘yxatdagi futbolchilardan farqli ravishda ko‘tarilish o‘rniga tushmoqda. U bundan bir yil avval 1 million 200 ming yevroga baholangandi. Bunga yetarlicha sabablar bor, ulardan biri sifatida Dostonning o‘yinida bir necha yildan beri avvalgi shijoatning yo‘qolganini aytsa bo‘ladi.
Odiljon Hamrobekov, “Paxtakor”, 1 million yevro
Superliganing eng qimmat o‘yinchisi hisoblangan Odiljon Hamrobekov katta futbolga 2013-yilda “Nasaf” jamoasi orqali kirib kelgan va tezda o‘z o‘rnini topib olishga muvaffaq bo‘lgan. Shuningdek, u o‘smirlar va yoshlar terma jamoasidagi o‘yinlari orqali ham muxlis va mutaxassislarning e’tiborini o‘ziga jalb etgan. 2019-yildan esa “Paxtakor” sharafini himoya qilib kelmoqda — orada yarim mavsum BAA klubida ijara asosida to‘p tepdi.
Hozirda u yana “Paxtakor” safida Sobirxo‘jayev bilan birgalikda raqib hujumlarini buzish va jamoaning yangi hujumini boshlab berish bilan shug‘ullanmoqda. Uning ustun tomonlari sifatida maydonni yaxshi ko‘ra olish va kurashlardan qochmasligini aytish mumkin.
Izoh (0)