Qashqadaryo viloyatining Kitob va Mirishkor tumanlarida Yangi yil bayrami arafasida 16 nafar ijtimoiy og‘ir ahvoldagi xotin-qizga yangi xonadon kaliti topshirildi. Bu haqda tadbirda qatnashgan “Daryo” muxbiri xabar berdi.
Qayd etilishicha, bayram arafasida viloyatning Kitob tumanida 10 nafar, Mirishkor tumanida 6 nafar ijtimoiy og‘ir ahvolga tushib qolgan xotin-qizga yangi xonadon berilgan.
Kitob tumani hokimligi axborot xizmati rahbari Qahramon Oqilovning ma’lumot berishicha, tumanda 10 nafar xotin-qizga uy olib berish uchun mahalliy budjetdan 180 million so‘m sarflangan bo‘lib, uyning dastlabki badal to‘lovi to‘lab berilgan. Mirishkor tumanida esa olti nafar xotin-qizga olib berilgan uylarning dastlabki badal to‘lovi uchun 93 million so‘m mablag‘ sarflangan.
“Yangi yilni yangi uyda, o‘z xonadonida kutib olish baxti nasib etgan ayollarimizni yangi xonadon bilan tabriklaymiz. Prezident tashabbusi bilan nafaqat Mirishkorda, respublikamizning barcha hududlarida ijtimoiy og‘ir ahvoldagi xotin-qizlarni qo‘llab-quvvatlash, ularga imkon qadar ko‘maklashish ishlari davom etmoqda. Mana shu ishlarning davomi sifatida bugun olti nafar xotin-qizga yangi xonadon berilyapti”, — deydi Mirishkor tumani hokimi Sherali Sanayev.
Qo‘shimcha qilinishicha, viloyatdagi arzon uy-joylar “Qishloqqurilishinvest” injiniring kompaniyasi buyurtmasi asosida qurib bitkazilgan bo‘lib, 2021-yil davomida bunday uylardan 35 ta qurilgan.
Mavzuga doir:
- Qashqadaryoda Yangi yil bayrami arafasida 180 ta oilaga yangi xonadon kalitlari topshirildi
- Qashqadaryoda 10 nafar chin yetimga bepul uy berildi, 100 ta kam ta’minlangan oila farzandlarining kontrakt puli to‘lab berildi
- Samarqand hokimi Olimpiya va Paralimpiya o‘yinlari sovrindorlariga uy sovg‘a qildi