O‘zbekistonda yuridik shaxslarning mol-mulk solig‘i kamaytirildi

O‘zbekistonda yuridik shaxslarning mol-mulkiga solinadigan soliq kamaytirildi. Bu haqda Telegram’dagi “Huquqiy axborot” kanali xabar qildi.

Qayd etilishicha, prezident “O‘zbekiston Respublikasi Soliq kodeksiga o‘zgartish va qo‘shimchalar kiritish to‘g‘risida”gi qonunni imzolagan. Qonun bilan foydali qazilmalarni qazib olganlik uchun maxsus renta solig‘i joriy etilgan.

Qimmatbaho, rangli va radioaktiv metallarni, nodir elementlarni va nodir yer elementlarini qazib oluvchi va ularni texnogen mineral hosilalardan ajratib oluvchi, uglevodorod xomashyosini qazib oluvchi yuridik shaxslar foydali qazilmalarni qazib olganlik uchun maxsus renta solig‘ini to‘lovchilar hisoblanadi.

Mazkur soliq stavkasi soliq bazasiga nisbatan 25 foiz miqdorida belgilanadi. Soliq to‘lovchisi bo‘lgan chet el investorlari soliq hisobini AQSh dollarda yuritishi mumkin. Soliq imtiyozlarini hisobga olish axborot tizimlari orqali va maxsus identifikatsiya kodini bergan holda amalga oshiriladi.

Shuningdek, tamaki va alkogol mahsulotlariga nisbatan yangi soliq stavkalari belgilanadi.

Soliq imtiyozlarida quyidagilar soliqqa tortilmasligi belgilandi:

• soliq to‘lovchining professional va oliy ta’lim muassasalarida o‘qish uchun banklardan olingan ta’lim kreditlariga yo‘naltirilgan daromadlari, ish haqi;
• talabalarga ijaraga berilgan uy-joylardan olingan daromad.

• xalqaro tashkilotlarga a’zolik badallari;
• qayta tayyorlash va malaka oshirish uchun nodavlat ta’lim tashkilotlariga to‘lovlar.

Yetim bolalar va ota-ona qaramog‘idan mahrum bo‘lgan bolalar mulkida bo‘lgan mol-mulk soliq solishdan ozod etiladi.

2021-yil 1-sentyabrdan 2021-yil 31-dekabrga qadar bo‘lgan davrda umumiy ovqatlanish korxonalari yuridik shaxslardan olinadigan yer solig‘ini va yuridik shaxslarning mol-mulkiga solinadigan soliqni to‘lashdan ozod etiladi.

Respublika tumanlarida (bundan Toshkent shahri mustasno) faoliyatni amalga oshiruvchi yakka tartibdagi tadbirkorlar uchun belgilangan ijtimoiy soliq stavkasi 2022-yil 1-yanvardan 2023-yil 1-yanvarga qadar BHMning 50 foizi miqdorida qo‘llanadi.