Yo‘l harakati qoidalarini buzganlik uchun jarimalarni undirish bo‘yicha tizimli ishlar olib borilmoqda va mansabdorlarning xizmat mashinalari ham bundan mustasno emas. Bu haqda IIV matbuot kotibi Shohruh G‘iyosov Farg‘onada bo‘lib o‘tgan jurnalist va blogerlar bilan uchrashuvda ma’lum qildi, deya xabar beradi “Daryo” muxbiri Azizbek Abduvaliyev.
Vazirlik mutasaddisi “Daryo” muxbirining mansabdor shaxslarning xizmat avtomobillari bilan bog‘liq to‘lanmay kelinayotgan jarimalar haqidagi savoliga javoban quyidagilarni bildirdi:
“Bunday holatlarga keyingi paytlarda juda katta e’tibor berilyapti. Xususan, jurnalist va blogerlar tomonidan. Ularga buning uchun minnatdorligimizni bildiramiz. Masalaning ikkinchi tomoni ham bor: aytaylik, jarima yozilgan transport vositasi ichki ishlar organlariga tegishli bo‘lsa, bu holat bo‘yicha ma’lumot birinchi navbatda shaxsiy xavfsizlik xizmatiga yetib keladi va o‘rganiladi. Agarda xodim oxirgi zarurat sifatida qoidani buzgan bo‘lsa, unga nisbatan chora ko‘rilmaydi. Chunki xodim o‘z vazifasini bajarish uchun tezkorlik bilan voqea joyiga yetib borishi shart. Agar o‘zining e’tiborsizligi bilan bog‘liq bo‘lsa, albatta, jarima to‘laydi. Masalan, oxirgi shunday shov-shuvli holat Toshkent viloyatida kuzatildi: oltita qoidabuzarligi bor, ammo shundan faqat bittasi chindan ham o‘zining aybi bilan bo‘lgan. Bu uchun jarima to‘lanadi”, — dedi Shohruh G‘iyosov.
G‘iyosovga ko‘ra, bugungi kunga kelib respublika bo‘yicha yo‘l harakati qoidalarini buzganlik uchun jarimalardan qarzdorlik 4 milliard so‘mdan oshmoqda.
Izoh (0)