Qashqadaryoda pistolet va elektroshoker bilan fuqaroning pul va buyumlarini tortib olgan shaxslar ushlandi

Qashqadaryo viloyati Chiroqchi tumanida fuqaroning ko‘p miqdorda pul va buyumlarini bosqinchilik yo‘li bilan o‘margan shaxslar qo‘lga olindi, deya xabar qilmoqda Tergov departamenti.

Qayd etilishicha, 2021-yil 25-dekabr kuni soat 16:30 larda Chiroqchi tumani Qarshi–Samarqand avtomobil yo‘li chetida 27 yoshli U.L.ning boshqaruvida bo‘lgan Matiz avtomashinasida tanishi bilan gaplashib o‘tirganida ularning yoniga Nexia-2 kelib to‘xtaydi.

Ushbu avtomashinadan uch nafar noma’lum shaxslar tushib, “yordam kerak emasmi, sizni bir minutga mumkinmi, gapimiz bor” deb, uni o‘zlarining avtomashinasiga mindirib, so‘ng uni pistolet, elektroshoker qurilmasi va chopqi pichog‘i bilan qo‘rqitib, hayot uchun xavfli bo‘lgan zo‘rlik ishlatadi.

Zo‘ravonlar U.L.ning yonida bo‘lgan 1 820 000 so‘m, 701 AQSh dollarini, bir dona narxi 2 500 000 so‘mlik Samsung A22, bir dona 700 000 so‘mlik iPhone 5s telefonini, avtomashinasiga o‘rnatilgan bir dona narxi 100 AQSh dollari bo‘lgan T99 videoregistratorini, bir dona narxi 70 000 so‘mlik 8 GB fleshkasini va ikki dona narxi 10 000 so‘mlik o‘t oldirgich (“zajigalka”)ni tortib olib hodisa joyidan yashirinadi.

Olib borilgan tezkor-qidiruv natijasida ushbu jinoyatni 20 yoshli J.E., 21 yoshli R.O. va 24 yoshli A.S. sodir qilgani aniqlanib, ulardan bir dona pnevmatik to‘pponcha (o‘qlari va gaz balonchalari bilan), bir dona elektroshoker qurilmasi, bir dona T99 videoregistrator, bir dona Samsung A22 va bir dona iPhone 5s telefon, 1 196 000 so‘m pul, bir dona ryukzak sumka hamda bir juft qo‘lqop ashyoviy dalil tariqasida rasmiylashtirib olingan.

Mazkur holat yuzasidan Chiroqchi tumani IIO FMB huzuridagi Tergov bo‘limi tomonidan J.E., R.O., va A.S.ga nisbatan Jinoyat kodeksining 164-moddasi 2-qismi “a, b” bandlari (qurol yoki qurol sifatida foydalanish mumkin bo‘lgan boshqa narsalarni ishlatib hamda bir guruh shaxslar tomonidan oldindan til biriktirib sodir etilgan bosqinchilik) bilan jinoyat ishi qo‘zg‘atilib, gumon qilinuvchilar protsessual tartibda ushlanganlar.

Tergov harakatlari davom etmoqda.

Ma’lumot uchun, yuqoridagi modda bilan aybdor deb topilgan shaxslar 8 yilda 10 yilgacha ozodlikdan mahrum etilishi mumkin.