Hozirgi kunda poytaxt maktablarida yuzaga kelgan vaziyat tashvishlanarli. Bu haqda Toshkent shahar IIBB boshlig‘i general-mayor Aziz Toshpo‘latov ma’lum qildi, deb xabar beradi “Podrobno”.
“O‘qituvchilar maktabda o‘quvchilarni nazorat qilishga, o‘quv jarayonini tashkillashtirishga, o‘quvchilar yo‘q bo‘lsa — uning kelmagani sababini bilishga majbur. Bor e’tibor faqatgina oliy ta’lim muassasalariga kirgan bolalarning foizlar nisbatiga qaratilishi kerak emas. Eng muhimi — o‘quvchilar bilan ma’naviy-axloqiy tarbiya ishlarini o‘tkazish”, — deydi Toshpo‘latov.
Huquqbuzarliklar profilaktikasi boshqarmasi boshlig‘i polkovnik Ravshan Sultonxo‘jayevning so‘zlariga ko‘ra, umumta’lim maktablarining o‘quvchilari orasida huquqbuzarlik holatlari ko‘paygan.
Poytaxtdagi umumta’lim maktablarida o‘tkazilgan tekshiruvlar davomida ayrim o‘quvchilar sababsiz darslarga kelmayotgani aniqlangan. Ayrimlarining yonida o‘tkir-tig‘li buyumlar topilgan bo‘lsa, ba’zilarining mobil telefonida pornografik materiallar borligi ma’lum bo‘lgan.
Bundan tashqari, voyaga yetmaganlar orasida elektron tamaki va snyus (tutunsiz tamaki mahsuloti turi) chekish holatlari aniqlangan.
Avvalroq Toshkentda ikki maktab o‘quvchisi o‘zaro janjallashgani, Toshkent viloyatidagi maktab sportzalida o‘quvchilar o‘rtasida ommaviy mushtlashuv sodir bo‘lgani, Toshkentda avtomobil yo‘lining o‘rtasida cho‘milgan o‘quvchining ishi Bolalarni himoya qilish masalalari bo‘yicha komissiyada ko‘rib chiqilgani to‘g‘risida xabar berilgandi.
Izoh (0)