“Hozirda odamlarni aeroportlarga kiritishga shunchaki sharoit yo‘q, ammo tez orada vaziyat o‘zgaradi” — Ra’no Jo‘rayeva

Uzbekistan Airports kompaniyasi rahbari Ra’no Jo‘rayeva nima sababdan fuqarolar aeroport binosiga kiritilmasligi, uchib kelayotganlarni kutib olmoqchi bo‘lgan yaqinlari sovuq va jaziramada ko‘chada kutishi kerakligi to‘g‘risidagi savolga javob berdi, deb xabar beradi “Podrobno”.

“Ayni vaqtda aeroportlar binolariga kuzatuvchilar va kutib oluvchilarning kirishini cheklovchi hukumat qarori amalda. Islohotlar doirasida biz ushbu qarorning bekor qilish tashabbusi bilan chiqdik, chunki allaqachon yangi texnologiyalar yo‘lovchilarning transport xavfsizligini ta’minlash imkonini bermoqda. Ammo hozirda odamlarni binoga qo‘yish uchun shunchaki sharoit yo‘q. Mazkur qarorni bekor qilib, odamlarning kiritsak, to‘s-to‘palon yuzaga keladi”, — deydi Uzbekistan Airports rahbari.

Ta’kidlanishicha, ushbu muammo mamlakat aeroportlari maydonlarini kengaytirish va keng sig‘imli yangi aerovokzallarni qurish bo‘yicha amalga oshiriladigan rekonstruksiyalar jarayonida hal etiladi. Kuzatuvchilar va kutib oluvchilar uchun kutish zallari, kafe va boshqa qulayliklar yaratiladi.

Avvalroq Ra’no Jo‘rayeva O‘zbekistonda aeroportlar xususiylashtirilmasligi, chunki “bunday sog‘in sigir o‘zimizga ham kerakligi” haqida gapirgan edi. Shunga qaramay, O‘zbekiston tomoni aeroportlarning turli elementlarini rivojlantirish uchun xususiy investitsiyalarni jalb etishga tayyor. Bu borada davlat-xususiy sherikchilik imkoniyatlaridan keng foydalanish mumkin.