Buxoroda 17 yildan buyon faoliyat yuritib kelayotgan 32-sonli Mehribonlik uyi faoliyati tugatildi. Bu haqda “Daryo”ga Milliy gvardiya Buxoro viloyati boshqarmasi ofitseri, katta leytenant Murodjon Rahmatullayev xabar berdi.
Qayd etilishicha, Buxoro shahridagi 31-sonli Mehribonlik uyida 83 nafar tarbiyalanuvchi bo‘lib, ularning 2 nafari turmush qurgan, 6 nafari oliy ta’lim muassasalariga, 4 nafari turli texnikumlarga, 10 nafari kasb-hunar maktablariga birkitilgan, 4 nafari homiylikka, 2 nafari potranat va 2 nafari vasiylikka berilgan. Shuningdek, 9 nafar 7 yoshgacha bo‘lgan tarbiyalanuvchilar viloyat Bolalar uyiga joylashtirilgan.
“43 nafar bolani esa yangi oila, yangi hayot o‘z bag‘riga chorladi. Ilk bor Mehribonlik uyining 6 nafar tarbiyalanuvchisi tadbirkor Vahob Behbudov hamda Nargiza Sa’dullayevalar oilasiga olindi. Oilaviy shifokorlar Hakim Jumayev va Zarnigor Sadirovalar ham 6 nafar bolaga ota-ona bo‘lishganidan mamnun.
Enter Engineering zavodi ishchisi Nodirbek O‘rinov hamda uy bekasi Muhabbat Aslonovalar oilasi 7 nafar bolani farzandlikka olishgan bo‘lsa, tadbirkorlik bilan shug‘ullanib kelayotgan Ahad Saidov hamda Marhabo Behbudovalar oilasi 5 nafar, Hikmatullo Asatullayev va Hamida Homidovlar xonadoni 6 nafar, Sobir Ochilov hamda Feruza Husanovalar oilasi 6 nafar, o‘qituvchilar oilasi bo‘lgan Fazliddin Sattorov va Gulchehra Sharipovalar 5 nafar bolani asrab olishdi.
Ma’lumki, prezident qarori asosida yetim bolalarni tarbiyalash bilan Milliy gvardiya shug‘ullanishi tartibi belgilangan edi. Shu nuqtayi nazardan, farzand asrab olgan oilalar orasida milliy gvardiya tizimida faoliyat ko‘rsatadiganlar ham bor”, — dedi Murodjon Rahmatullayev.
Ta’kidlanishicha, 2021-yilning 25-dekabr kuni Mehribonlik uyida qolgan 7 nafar bolani tadbirkorlik bilan shug‘ullanib kelayotgan Mehriddin Mattiyev hamda Nilufar Rajabovalar xonadoni farzandlikka olgan. Mehribonlik uyi darvozalari uni 17 yil ilgari tashkil etgan direatori Saida Sharipova tomonidan yopilgan.
“Mehribonlik uyi darvozasini 17 yil ilgari o‘zim ochgandim, bugun uni yana o‘zim yopdim. To‘g‘risi, Mehribonlik uyi darvozasi yopilgach, ko‘nglim allanechuk bo‘lib, yig‘lab olganimni ham yashirmayman. Vaholanki, ular 17 yildan buyon ko‘z o‘ngimda unib-o‘sib, navqiron yoshga yetishdi. Farzandlarimdek bo‘lib qolishgandi. Ular bilan nafas oldim, ular bilan quvondim, ular bilan qayg‘uga botdim. Xayrlashish oson kechmadi. Ammo, meni quvontirgani endi har birining ota-onasi, o‘z oilasi bor. Shunisi muhim.
Erinmayman, har kuni ularning holidan xabar olib turaman. Endi men bolalarimni sog‘inib, o‘nga yaqin oilaviy mehribonlik uylari darvozalarini qoqaman. Har biriga ota-ona, oila nasib etganiga shukronalar keltiraman”, – deydi 17 yildan buyon Mehribonlik uyini boshqarib kelayotgan Saida Sharipova ko‘ziga yosh olib.
Bildirilishicha, mazkur Mehribonlik uyida 80 nafar ishchi-xodim faoliyat ko‘rsatib kelgan. Ayni paytda ularning ish bilan bandligini ta’minlash hamda bo‘shab qolgan binodan nima maqsadda foydalanilishi haqida “Daryo” muxbiri qiziqqan.
Aytilishicha, 80 nafar sobiq xodim uch oy ilgari mutaxassisligi bo‘yicha ish izlashi haqida ogohlantirilgan. Ayni paytda, ularning ro‘yxati viloyat Bandlik bosh boshqarmasiga yuborilgan.
To‘plangan qo‘shimcha ma’lumotlarga ko‘ra, binodan yetim bolalar va ota-ona mehridan mahrum bo‘lgan bolalar farzandlikka, vasiylikka hamda homiylikka olingunga qadar vaqtincha joylashtirish maskani sifatida foydalanilishi nazarda tutilgan. Shuningdek, Milliy gvardiyaning hududiy bo‘limlari huzurida reablitatsiya markazlari yo‘nalishidagi “Yoshlar markazlari” faoliyatini joriy etish chora-tadbirlari ham belgilangan.
Mavzuga doir:
Izoh (0)