2021-yilda yalpi ichki mahsulotning o‘sishi fonida Turkiya XXI asrning porlayotgan yulduziga aylandi. Bu haqda mamlakat prezidenti Rajab Toyyib Erdo‘g‘on Gaziantep viloyatida hukmron partiya funksionerlari oldidagi chiqishida aytib o‘tdi. Ko‘rsatuvni Turkiyaning Haber Global telekanali efirga uzatdi.
“Turkiya XXI asrning porlayotgan yulduzidir”, — dedi Erdo‘g‘on. U buni 2020-yilda Turkiya iqtisodiyoti dunyo iqtisodiyotiga nisbatan 1,8 foizga, 2021-yilning birinchi choragida 7,2 foizga, ikkinchi chorakda 21,7 foizga, uchinchi chorakda 7,8 foizga o‘sgani bilan izohladi.
“Shubhasiz, so‘nggi uch oy ham o‘zining yuksak taraqqiyoti bilan yodda qoladi”, — dedi Turkiya prezidenti.
Bundan tashqari, Erdo‘g‘on Turkiya hukumati Xalqaro valyuta jamg‘armasi oldidagi avvalroq 23,5 milliard dollarga yetgan qarzni to‘lashga, Markaziy bank zaxiralarini 27,5 milliard dollardan 120 milliard dollarga oshirishga muvaffaq bo‘lganini ta’kidladi.
Turkiya pul-kredit siyosatini yumshatish siklini boshdan kechirmoqda, ayni paytda dunyodagi aksariyat markaziy banklar esa o‘z siyosatini qat’iylashtirmoqda. 2021-yilning sentabridan boshlab Turkiya Markaziy banki asosiy stavkasini 19 foizdan 14 foizga tushirdi. Erdo‘g‘on stavkalarning o‘sishiga qarshi, u bunday yondashuv inflyatsiyani tezlashtiradi va uning o‘sishini to‘xtata olmaydi, deb da’vo qilgan.
Erdo‘g‘onning so‘zlariga ko‘ra, stavkani pasaytirish Turkiyada iqtisodiy o‘sishni, eksport va kredit berishni rag‘batlantirish uchun zarur. Shuningdek, Turkiya rahbarining fikricha, bunday pul siyosati foyda olish yo‘li sifatida sudxo‘rlik qilishni taqiqlovchi Islom qadriyatlari bilan oqlanadi.
Turkiyada 2021-yil boshidan buyon lira kursi dollarga nisbatan qariyb ikki barobarga arzonlashgan: kursning eng jiddiy qulashi noyabrda qayd etildi — turk valyutasi bir oyda o‘z qiymatining 40 foizini yo‘qotdi. Liraning tarixiy minimumga qadar tushib ketishi ortidan 23-noyabr kuni yirik shaharlarda yuzlab odamlar ko‘chalarga chiqib, prezidentning iste’fosini talab qildi. Erdo‘g‘on esa fuqarolarni sabrli bo‘lishga va hukumatning yangi iqtisodiy modeliga ishonishga chaqirdi, tovarlar narxining oshishidan foydalanib qolmoqchi bo‘lgan shaxslarga rahm-shafqat qilmasligini aytdi. Biroq vaziyat kundan kunga yomonlashib, mahsulotlarning narxi va dollar kursi oshib boryapti.
Izoh (0)