Qashqadaryo viloyati Kitob tumanidan o‘tgan M-39 avtomobil yo‘lining Taxtaqoracha dovoni 26-dekabr kuni soat 11:00 dan vaqtincha yopildi. Bu haqda Favqulodda vaziyatlar vazirligi xabar qildi.
Ma’lum qilinishicha, tinimsiz yog‘gan qalin qor oqibatida yo‘lning yuza qismida muzlamalar hosil bo‘lgan.
“Ayni daqiqalarda vaziyat oqibatlarini bartaraf etish borasida keng ko‘lamli profilaktik ishlar amalga oshirilmoqda“, — deyiladi FVV axborotida.
Yo‘l harakati xavfsizligi bosh boshqarmasi holat bo‘yicha qo‘shimcha ma’lumot berdi. Samarqand va Qashqadaryo viloyatlarini bog‘lovchi dovonda avtotransport vositalari harakati vaqtincha to‘xtatilgan. Muzlamalarni eritish uchun qum-tuz aralashmalari sepilib, zaruriy choralar ko‘rilmoqda.
“Haydovchilardan ehtiyotkor bo‘lishlarini, ob-havo va yo‘l sharoitini inobatga olib transport vositasini boshqarishlarini so‘raymiz”, — deya YHXBB haydovchilarga murojaat qilgan.
Eslatib o‘tamiz, Taxtaqoracha dovoni 13-dekabr kuni ham qalin qor yog‘gani sabab yopilgandi. 14-dekabrga kelib dovonda avtomobillar harakati tiklangan.
Izoh (0)