O‘zbekiston 2021-yilning yanvar—noyabr oylarida xorijdan qariyb 174 mln dollarlik mobil telefon import qilgan
2021-yilning yanvar–noyabr oylarida O‘zbekiston xorijdan qiymati 173,8 million dollarga teng bo‘lgan 2,6 million dona mobil telefon import qilgan. Bu haqda Davlat statistika qo‘mitasi xabar berdi.
Foto: “Daryo” / Madina Nurman
Ma’lum qilinishicha, telefon importi 2020-yilning mos davri bilan solishtirilganda 1,5 million donaga oshgan bo‘lib, O‘zbekiston 15 ta davlatdan mobil telefonlar import qilgan.
O‘zbekiston mobil telefonlarni eng ko‘p import qilgan davlatlar:
Xitoy – 88 million dollar;
Vyetnam – 68 million dollar;
Hindiston – 10 million dollar;
Qozog‘iston – 5,3 million dollar;
BAA – 1,6 million dollar;
Germaniya – 647 ming;
Rossiya – 175,8 ming dollar.
Avvalroq O‘zbekistonda mobil aloqa abonentlari soni 27 million nafarga yaqinlashgani, O‘zbekiston mobil internet arzonligi bo‘yicha dunyo reytingida 21-o‘rinni egallagani to‘g‘risida xabar berilgandi.
Eslatib o‘tamiz, O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi 2019-yil 1-apreldan joriy etilgan. 2020-yil 22-sentabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgan, unga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerakligi belgilangandi. Qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkinligini bildirgan.
Izoh (0)