O‘zbekistonda Hindistonning National Institute of Fashion Technology instituti filiali ochiladi. Bu boradagi kelishuvga “O‘zto‘qimachiliksanoat” uyushmasi raisining birinchi o‘rinbosarining Hindistonga tashrifi davomida erishilgan, deb xabar beradi uyushma matbuot xizmati.

Ta’kidlanishicha, National Institute of Fashion Technology institutining O‘zbekistonda filiali ochilishiga kelishib olingan. Loyiha doirasida Textile Engineering fakulteti tashkil etilib, O‘zbekiston to‘qimachilik sohasi uchun zarur kadrlar malakali mutaxassislar tomonidan kerakli bilim va ko‘nikmalarga o‘qitiladi.

Avvalroq Rossiya O‘zbekistonda 8 ta OTM filialini ochishi kutilayotgani, Toshkent viloyatida Janubiy Koreyaning Hwashin Cyber universiteti filiali ochilishi, Toshkentda Butunrossiya kinematografiya instituti filiali ochilgani to‘g‘risida xabar berilgandi.