Qoraqalpog‘istonda tabiiy ko‘ldan noqonuniy ravishda 211 dona baliqni ushlagan shaxslar qo‘lga olindi. Bu haqda Qoraqalpog‘iston Ekologiya qo‘mitasi matbuot xizmati xabar berdi.
Ma’lum qilinishicha, reyd davomida Amudaryo tumanida yashovchi fuqarolar Sh.Yu. va S.Ye., A.S. tomonidan Ellikqal’a tumani “Uchqo‘rg‘oq” OFY hududida joylashgan tabiiy ko‘ldan noqonuniy ravishda 86 dona ilonbaliq va 75 dona zag‘orabaliq, 48 dona qizilqanot, 2 dona sudak baliqlarini 10 ta leskali to‘r bilan ovlab kelayotgan vaqtida ushlangan.
O‘rganishlar davomida tabiatga 33,7 million so‘m zarar yetkazilgani aniqlangan. Qonunbuzar fuqarolarga nisbatan tegishli hujjatlar rasmiylashtirilgan. Orol tabiatni muhofaza qilish prokuraturasi tomonidan tergovga qadar tekshirish harakatlari olib borilmoqda.
Shuningdek, 20-dekabr kuni Qashqadaryoda o‘tkazilgan reyd tadbirlari davomida Mirishkor tumani “Oqmachit” MFYda yashovchi fuqaro U.Ya. va boshqalar elektr toki (“elektroudochka”) yordamida noqonuniy baliq ushlagani ma’lum bo‘lgan. Ular jami 385 dona — 1 dona zog‘orabaliq, 1 dona sudak, 75 dona “leshch”, 200 dona karas baliqlari va 108 dona “Qizil kitob”ga kiritilgan Turkiston mo‘ylovdoriga o‘xshash baliqlarni ovlagani aniqlangan.
Holat bo‘yicha Mirishkor tumani fuqaro U.Ya. va uning sheriklaridan 1 dona rezina qayiq, 1 dona akkumlyator, 2 dona elektr qarmoq, 3 metr tok uzaytirgich sim, 1 dona nasos, 4 ta qo‘lda yasalgan eshkak, 1 ta sim o‘ralgan yog‘och ashyoviy dalil sifatida olib qo‘yilgan.
“Qizil kitob”ga kiritilgan Turkiston mo‘ylovdori (shimbaliq) turiga mansub yoki mansub emasligi yuzasidan mutaxassis xulosasini olish uchun Fanlar akademiyasining Zoologiya institutiga aloqa xati orqali namuna yuborilgan.
Avvalroq Jizzaxda elektr qarmoqda baliq ovlab, hayvonot dunyosiga 10 mln so‘m zarar yetkazgan shaxslarga chora ko‘rilgani, Buxoroda noqonuniy ravishda yovvoyi quyon ovlagan brakonyerlar qo‘lga olingani to‘g‘risida xabar berilgandi.
Izoh (0)