Xalq deputatlari Uychi tuman kengashining navbatdan tashqari sessiyasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Sessiyada tashkiliy masala ko‘rildi.
Viloyat hokimi Shavkat Abdurazzoqov deputatlarga salomatligi tufayli tuman hokimi lavozimini tark etgan Muhammadzokir Mamatxanov o‘rniga Shuhrat Musayev nomzodini taklif etdi.
Ma’lumot uchun, Muhammadzokir Mamatxanov 2021-yil 30-noyabridan e’tiboran salomatligini tiklash maqsadida davolanayotgan, hokim vazifasini uning birinchi o‘rinbosari Shokirjon Imamov vaqtincha bajarayotgan edi.
Shuhrat Musayev 1973-yili Chortoq tumanida tug‘ilgan. Ma’lumoti oliy, 1996-yili Andijon muhandislik-iqtisodiyot institutini tamomlagan.
1996-yildan 2017-yilga qadar Namangandagi iqtisodiy tashkilotlar va viloyat hokimligida turli mas’ul vazifalarda mehnat qilgan. 2017-yildan 2021-yilga qadar viloyat kasaba uyushmalari tashkilotlari birlashmasini boshqargan.
U 2021-yildan beri Namangan viloyati hokimining o‘rinbosari—Mahalla va oilani qo‘llab-quvvatlash boshqarmasi boshig‘i lavozimida ishlab kelayotgan edi.
Kengashga nomzodning Uychi tumanini ijtimoiy-iqtisodiy rivojlantirish bo‘yicha yo‘l xaritasi taqdim etildi. Deputatlar nomzodni ma’qullab, ovoz berdi. Shuhrat Musayev Uychi tumani hokimi etib tasdiqlandi.
Eslatib o‘tamiz, bu Namangan viloyatidagi to‘rtinchi hokim almashinuvi bo‘ldi. Uychi tumaniga qadar Kosonsoy, Norin va Uchqo‘rg‘on tumanlarida yangi hokimlar ish boshlagandi.
Izoh (0)