Jo‘rabek Nurmatov Norin tumani hokimi etib tayinlandi

Xalq deputatlari Norin tuman kengashining navbatdan tashqari sessiyasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Sessiyada tashkiliy masala ko‘rildi. Tumanning sobiq hokimi Dilmurod Qodirov bugun, 22-dekabr kuni bo‘lib o‘tgan sessiyada Kosonsoy tumani hokimi etib tasdiqlangandi.

Viloyat hokimi Shavkat Abdurazzaqov norinlik deputatlarga Jo‘rabek Nurmatov nomzodini tavsiya qildi. Jo‘rabek Nurmatov 1979-yili Namangan viloyatining Norin tumanida tug‘ilgan. Ma’lumoti oliy, 2003-yilda Andijon qishloq xo‘jaligi institutini tamomlagan.

U 2018-yildan beri Norin tumani hokimining birinchi o‘rinbosari lavozimida ishlab kelayotgandi.

Jo‘rabek Nurmatov tumanni iqtisodiy-ijtimoiy rivojlantirish bo‘yicha rejalari va yo‘l xaritasini kengashga taqdim qildi.

Deputatlar nomzodni ma’qullab, ovoz berdi. Nurmatov Norin tumani hokimi etib tasdiqlandi.