Andijonda usta 250 ming so‘m ish haqini bermagani uchun mijozini pichoqladi

Andijon viloyati Paxtaobod tumanida 10-dekabr kuni usta ish haqini bermagan tanishini pichoqladi. Bu haqda Tergov departamenti xabar qildi.

Qayd etilishicha, shu kuni noma’lum shaxs Poshshombog‘i ko‘chasida yashovchi V.X.ning (1972-yilda tug‘ilgan) yashash xonadoniga g‘ayriqonuniy ravishda kirib, xonadon egasi bilan janjallashib, janjal jarayonida xo‘jalik pichog‘i bilan uning qorin, orqa kurak va qo‘l sohalariga urib, hayot uchun xavfli bo‘lgan og‘ir tan jarohati yetkazib, hodisa joyidan yashiringan. Oqibatda V.X. olgan tan jarohatlari bilan tibbiyot muassasasiga yotqizilgan.

Olib borilgan dastlabki tergov jarayonida ushbu jinoyatni T.Z. (1994-yilda tug‘ilgan) sodir etgani aniqlangan. Jinoyatning kelib chiqishiga T.Z. sentabr oyida jabrlanuvchi V.X.ning buyurtmasiga asosan uning yashash xonadonida ta’mirlash ishlarini olib borgani, ammo ta’mirlash ko‘ngildagidek bo‘lmagani sababli V.X. tomonidan fuqaro T.Z.ga xizmat haqi uchun 250 ming so‘m bermagani sabab bo‘lgan.

Mazkur holat yuzasidan unga nisbatan Jinoyat kodeksning 104-modda 2-qismi (qasddan badanga og‘ir shikast yetkazish) bilan jinoyat ishi qo‘zg‘atilgan.

Bundan tashqari, 16-dekabr kuni Toshkent shahri Chilonzor tumanida yana bir pichoqbozlik bilan bog‘liq jinoyat sodir etilgan. Shu kuni soat 16:40 atrofida tuman Ichki ishlar organi navbatchilik qismiga Respublika shoshilinch tibbiy yordam ilmiy markazidan K.A. (1987-yilda tug‘ilgan) og‘ir tan jarohati bilan yotqizilgani to‘g‘risida xabar kelib tushgan.

Aniqlanishicha, 16-dekabr kuni soat 13:45 atrofida K.A. tumanning Xirmontepa ko‘chasida tanishlari X.R. (1979-yilda tug‘ilgan) va M.B. (1988-yilda tug‘ilgan) bilan uchrashgan. Ular K.A.dan 1 million 600 ming so‘m qarzini qachon berishini so‘rab, janjallashgan. Shu vaqtda M.B. cho‘ntagidagi pichoq bilan K.A.ni bir necha marta jarohatlagan.

Holat yuzasidan Jinoyat kodeksning 104-moddasi 2-qismi d, k, e, l bandlari (qasddan badanga og‘ir shikast yetkazish) bilan jinoyat ishi qo‘zg‘atilib, X.R. va M.B. protsessual tartibda ushlangan. Tergov harakatlari davom etmoqda.