Qirg‘iziston IIV ichki qo‘shinlarining qo‘mondoni qariyb 400 ming dollar mablag‘ni talon-toroj qilishda ayblanib qo‘lga olindi

Qirg‘iziston Ichki ishlar vazirligi ichki qo‘shinlarining qo‘mondoni, polkovnik Islombek Kenjequlov qariyb 400 ming dollar mablag‘ni talon-toroj qilishda ayblanib qo‘lga olindi. Bu haqda respublika Bosh prokuraturasi matbuot xizmatiga tayanib, “RIA Novosti” xabar berdi.

“Gumonlanuvchi (Kenjequlov) ichki qo‘shinlarga yetkazilgan 34 million som miqdoridagi zarar bo‘yicha avvalroq qo‘zg‘atilgan ish doirasida qo‘lga olindi”, — dedi matbuot xizmati vakili.

Bir hafta oldin Bosh prokuratura Qirg‘iziston IIV ichki qo‘shinlarining mansabdor shaxslari tomonidan mablag‘larni talon-toroj qilish bo‘yicha korrupsion sxema aniqlangani haqida xabar bergandi.

Prokuror tekshiruvi natijasida ma’lum bo‘lishicha, xodimlarga oziq-ovqat va zarur ashyolar xarid qilish uchun mo‘ljallangan 33 million 496 ming som (taxminan, 400 ming dollar) pul qalbaki firmalarning hisob raqamlariga noqonuniy ravishda o‘tkazilgan, so‘ng o‘zlashtirib olingan.

Mazkur holat bo‘yicha ichki qo‘shinlarning mansabdor shaxslariga nisbatan Qirg‘iziston Jinoyat kodeksining 337- (mansabini suiiste’mol qilish), 209- (firibgarlik), 210- (omonatga ishonib topshirilgan mulkni juda katta hajmda o‘zlashtirish yoki isrof qilish), 346- (rasmiy hujjatlarni qalbakilashtirish) va 348- (beparvolik) moddalari bilan jinoyat ishi qo‘zg‘atilgan.

Kaktus.media xabariga ko‘ra, Kenjequlov hozirda Harbiy prokuratura tomonidan so‘roq qilinmoqda.

Avvalroq Kaktus.media mazkur ish bo‘yicha bir necha ayblanuvchi 29-noyabr kuni mamlakatni tark etishga muvaffaq bo‘lgani haqida xabar bergandi. Xususan, ular — Damir Ermekboyev, Qodirbek Kubatov va Nozgul Kalenbekova singari mansabdor shaxslar. Mablag‘lar “Kosya Atlant” MChJ va “Addik Kompani” MChJga o‘tkazilgan.

Keyinroq ushbu ish bo‘yicha IIV ichki qo‘shinlari moliya xizmati rahbari Talant Jo‘rabekov qo‘lga olingani xabar berildi.