Dunyo va o‘zbek sportiga oid 20-dekabrning eng muhim xabarlari dayjesti bilan tanishing.
O‘zbekiston
Superliga yo‘llanmasini qo‘lga kiritgan “Neftchi” 6 futbolchisi bilan shartnomani uzaytirdiFarg‘onaliklar klubi darvozabonlar Akbar To‘rayev, Mashhur Muhammadjonov, himoyachi Umar Athamzoda, yarim himoyachilar Abdulloh Olimov, Oybek Qilichev, Izzatilla Abdullayev va Aleksandr Yeshich bilan yangi bitim imzolanganini e’lon qildi. Ushbu futbolchilar o‘tgan mavsum “Neftchi”ning Pro-Liga chempionligini qo‘lga kiritishida yordam bergandi.
Eslatib o‘tamiz, PFL 2022-yilgi mavsum oldidan Superliga klublari transferlar oid cheklovlar qo‘ygan. Unga ko‘ra, Superliga jamoasi qishki transfer oynasida 10 nafar, Pro-Ligadan oliy divizionga yo‘l olgan klub esa 15 nafar yangi futbolchini ro‘yxatdan o‘tkazish huquqiga ega.
Jahon
APL klublari koronavirus bilan bog‘liq vaziyat yuzasidan yig‘ilish o‘tkazadi
20-dekabr, dushanba kuni APL klublari vakillari ishtirokida yig‘ilish bo‘lib o‘tadi. Unda koronavirus bilan bog‘liq vaziyat muhokama qilinadi, deya xabar qilmoqda The Telegraph.
Unda quyidagi masalalar ko‘rib chiqilishi kutilmoqda:
- O‘yinlarni qoldirish masalasi. Liga 28—30-dekabr kuniga mo‘ljallangan o‘yinlarni qoldirish masalasini ko‘rib chiqadi. Shuningdek, o‘yinni qoldirishga sabab bo‘ladigan shartlar borasida kelishib oladi.
- Qoldirilgan o‘yinlarni boshqa vaqtga ko‘chirish masalasi.
- O‘yinchilarni emlash masalasi. APLda futbolchilarning deyarli 1/3 qismi vaksinaning ikkinchi dozasi bilan emlanmagan. La Liga va Bundesligada bunday ko‘rsatkich 8 foizga teng. Shu sabab liga va klublar o‘yinchilarni vaksinatsiyadan o‘tkazish masalasini eng birinchi navbatda ko‘rib chiqadi.
- Kovid yo‘riqnoma masalasi. Koronavirus yo‘riqnomasiga qator o‘zgartirishlar kiritilishi kutilmoqda. Unga ko‘ra emlanmagan futbolchilar klubning boshqa vakillari bilan kontaktga kirishishi maksimal darajada cheklanadi. Ular uchun hatto alohida kiyinish xonasi va safarlar uchun alohida transport ajratilishi mumkin.
“Barselona” yanvar oyida transfer bozori faol bo‘ladi
Katalonlar bir qator futbolchilarini sotib yuborish istagida va yangi xaridlar amalga oshirmoqchi.
“Barselona” Filippe Koutinyo, Samyuel Umtiti, Neto, Lyuk de Yong va Serjinyo Destni sotib yubormoqchi. Bu orqali klub moliyaviy feyr-pley qoidalariga rioya qilishni ta’minlamoqchi, deya xabar qilmoqda Mundo Deportivo.
Futbolchilarning barchasi ham Xavining uslubiga tushmayapti, jamoa Koutinyo, Umtiti va Netoni esa yuqori maosh sabab sotib yubormoqchi.
Maoshlar vedomostida barqarorlik yuzaga keltirish orqali “Barselona” yangi futbolchilarni o‘z safiga qo‘shib olmoqchi. Katalonlar Edinson Kavani (“Manchester Yunayted”) va Ferran Torres (“Manchester Siti”) transferi ustida ishlamoqda.
Diario Sport’ga ko‘ra, “ko‘k-anorranglilar” Kavani bilan 1,5 yillik shartnoma borasida shaxsiy kelishuvga erishgan. Biroq bu kelishuv amalga oshishi uchun urugvaylik futbolchi “Yunayted” bilan amaldagi shartnomasini bekor qilishiga to‘g‘ri keladi. Sababi “Barsa” transferga pul sarflash niyatida emas.
Koronavirus sabab bekor qilingan “Tottenhem” — “Renn” uchrashuvida “shporlar”ga texnik mag‘lubiyat yozildi
UEFA Konferensiyalar Ligasi 6-turidan o‘rin olgan o‘yin yuzasidan qaror chiqardi. O‘yin londonliklar klubida koronavirus tarqalgani bois o‘tkazilmagandi.
UEFA uchrashuv “Tottenhem”ning aybi bilan bekor bo‘lganini qayd etdi va londonliklarga texnik mag‘lubiyat yozdi.
Shu tariqa “Renn” 14 ochko bilan guruhda birinchi o‘rinni egalladi, “Vitess” esa 10 ochko bilan ikkinchi bo‘ldi. 7 ochkoga ega “Tottenhem” Yevrokuboklar bilan xayrlashdi.
Muhammad Saloh muxlislar talqiniga ko‘ra APLda 2021-yilning eng yaxshi o‘yinchi deb topildi
Premyer Ligada yilning eng yaxshi o‘yinchisiga topshiriladigan Fans’ Footballer of the Year sovrini “Liverpul” forvardi Muhammad Salohga nasib etdi. Ovoz berish jarayonida 140 ming muxlis qatnashgan.
1. Muhammad Saloh (“Liverpul”)2. Deklan Rays (“Vest Hem”)3. Brunu Fernandesh (“Manchester Yunayted”)4. Filip Foden (“Manchester Siti”);5. Eduar Mendi (“Chelsi”);6. Meyson Maunt (“Chelsi”);7. Ruben Diash (“Manchester Siti”);8. Kevin de Bryuyne (“Manchester Siti”);9. Jorjinyo (“Chelsi”);10. Joau Kanselu (“Manchester Siti”).
“Barselona” “Kamp Nou”ni 1,5 mlrd yevroga ta’mirlaydi
“Barselona” klubi “Espai Barsa” loyihasi bo‘yicha referendum o‘tkazdi. Ovoz beruvchilarning 87,8 foizi (42,7 ming kishi) loyihani qo‘llab-quvvatlagan. 10,4% kishi (5 ming) esa qarshi chiqqan.
“Espai Barsa” loyihasi “Kamp Nou” atrofidagi katta hudud do‘konlar, restoranlar, klub ofisi, muzeyi, shuningdek, “Kamp Nou”, “Miniestadi” arenalari va “Palau Blaugrana” yopiq inshootini qamrab oladi. U yerlarda rekonstruksiya ishlari olib boriladi.
Ushbu loyihani amalga oshirish uchun klub prezidenti Xoan Laporta Goldman Sachs investitsion bankidan 1,5 milliard yevro miqdorida kredit olmoqchi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)