Samarqand va Qashqadaryo viloyatlarining ayrim hududlarida 19-dekabr kuni kuchli shamol va changli bo‘ron kuzatildi. Ijtimoiy tarmoqlarda holat aks etgan videolar tarqaldi.
Videoda aytilishicha, Samarqand shahriga o‘rnatilgan bayram archasi kuchli shamol oqibatida bukilib qolgan.
Yo‘l harakati xavfsizligi bosh boshqarmasi shamol va chang ko‘tarilish holatini tasdiqladi.
Qayd etilishicha, hozirda Qashqadaryo viloyatida changli bo‘ron to‘xtagan. Hududda yomg‘irli ob-havo kuzatilmoqda.
YHXBB haydovchilardan yo‘llarda ehtiyotkor bo‘lib, tezlik me’yoriga amal qilgan holda, oraliq masofani saqlab harakatlanishni so‘ragan.
Eslatib o‘tamiz, O‘zbekistonga 4-noyabr kuni Ural tomondan sovuq havo oqimi, u bilan birga kuchli shamol kirib kelishi oqibatida (shamol tezligi Toshkentda soniyasiga 15 metrgacha, Buxoro, Navoiy, Jizzax viloyatlarida esa 25 metrgacha kuchaygan) mamlakatning bir qator hududlarida, xususan, Toshkent shahrida chang-qum bo‘ronlari kuzatildi. “O‘zgidromet” ma’lumotlariga ko‘ra, shu kuni soat 21:00—23:00 oralig‘ida Toshkent havosidagi chang ruxsat etilgan miqdordan 30 barobargacha oshib ketdi va havosining ifloslanishi darajasi bo‘yicha O‘zbekiston poytaxti dunyoda birinchi o‘ringa chiqdi. Chang 8-noyabrga kelibgina chekindi, ungacha poytaxt aholisi salkam to‘rt kutilmagan noqulaylik girdobida qoldi (masalan, Sog‘liqni saqlash vazirligi ma’lumotlariga ko‘ra, 5-noyabrdan 6-noyabr soat 06:00 ga qadar tez yordamga bo‘lgan 4110 ta chaqiriqdan 709 tasida fuqarolar nafas olish bilan bog‘liq muammolardan shikoyat qilgan).
Izoh (0)